Արցախի ժողովրդի ինքնորոշումը նույնքան կարեւոր է, որքան այլ ժողովուրդներինը

Նիդերլանդների հայկական համայնքի ներկայացուցիչները երկրի խորհրդարան են ներկայացրել Լեռնային Ղարաբաղի հարցով խնդրագիր:

Փաստաթղթում նշվում է, որ Արցախի ժողովրդի ինքնորոշումը նույնքան կարեւոր է, որքան  այլ ժողովուրդներինը, օրինակ` Կոսովոյինը, որի անկախությունը Նիդերլանդները ճանաչել է:

«Չի կարելի առաջնորդվել բացառապես աշխարհաքաղաքական, առեւտրատնտեսական եւ էներգետիկ շահերով»,- ասում են խնդրագրի հեղինակները եւ կոչ անում Նիդերլանդների խորհրդարանին դատապարտել ադրբեջանական վարչակազմի բռնությունները, ուշադրություն դարձնել Լեռնային Ղարաբաղի իրադրությանը, վերանայել Բաքվի հետ հարաբերությունները եւ նպաստել Ղարաբաղյան հակամարտության խաղաղ կարգավորմանը` հարգելով ԼՂՀ ժողովրդի ինքնորոշման իրավունքը:

Խնդրագիրը հանձնվել է Նիդերլանդների խորհրդարանի արտաքին հարաբերությունների հանձնաժողովի նախագահ Նեբահաթ Ալբայրակին, որն էլ վստահեցրել է, որ հանձնաժողովը կքննարկի խնդրագրում բարձրացված հարցերը:

Փաստաթուղթը ներկայացվելու է նաեւ երկրի արտգործնախարարին, Սենատի նախագահին, ԵԽԽՎ-ում եւ ԵԱՀԿ-ում նիդերլանդական պատվիրակությունների ղեկավարներին: