Կարող է համոզել նաեւ Ադրբեջանի նախագահին

Այս տարի լսողության հետ խնդիրներ ունեցող մոտ 10 երեխա անվճար կվիրահատվի «Փյունիկ» եւ Caro and Co ընկերության համատեղ ծրագրով:

«Փյունիկ» միության ծրագրերի ղեկավար Ռուզաննա Սարգսյանն ասաց, որ կվիրահատվեն մինչեւ 3 տարեկան երեխաները:

«Ծրագիրը երկարաժամկետ է, արդեն ընտրել ենք 3 երեխա: Շուտով կսկսվի դրամահավաքը եւ ընթացքի մեջ կլինեն աշխատանքները»,- նշեց նա:

Caro and Co ընկերության սեփականատեր եւ գործադիր տնօրեն Ռոզա Ալփերթը (նաեւ The sound world ՀԿ հիմնադիր) նշեց, որ դրամահավաքն իրականացվելու է բոլոր երկրներում: Նա կատակով նշեց նաեւ, որ եթե հարկավոր լինի, ինքը Ադրբեջանի նախագահին էլ կհամոզի, որ գումար տրամադրի հայ երեխաների վիրահատության համար:

«Ռուսաստանում արդեն բազմաթիվ երեխաների ենք վիրահատել: Ասեմ, որ լսողության խնդիրներ ունեցող երեխաները հիմնականում շատ տաղանդավոր են լինում, եւ վիրահատությունից հետո ուղղակի լսող Բեթհովեն են դառնում»,- ասաց տիկին Ալփերթը:

Նշենք, որ երեխաների ընտրությունը կատարվելու է` ելնելով վերջիններիս ընտանիքների սոցիալական վիճակից: