ԱՄՆ-ում 74 հայ են ձերբակալել

Ամերիկյան իրավապահ մարմինները փետրվարի 16-ին լայնամասշտաբ հատուկ գործողություն են իրականացրել հայաստանցիներից կազմված Armenian Power հանցավոր կազմակերպության դեմ. գրում է The Los Angeles Times: Արդյունքում ձերբակալվել է 74 մարդ: Ձերբակալությունները մեծ մասամբ իրականացվել են Կալիֆոռնիայում, սակայն նաեւ Մայամիում եւ Դենվերում:

Դրանք բանկային զեղծարարությունների վերաբերող երկամյա հետաքննության արդյունք են: Հետաքննությամբ պարզվել է, որ զեղծարարները 99 Cent Only սուպերմարկետների ցանցում փոխել են կրեդիտային քարտերը, ձեռք բերել դրանց տերերին վերաբերող անհատական տեղեկություններ, ապա պատրաստել կեղծ քարտեր:

 Հանցավոր խմբի անդամներին մեղադրում են նաեւ այլ հանցագործությունների մեջ` մարդկանց առեւանգում, հարձակումներ, թմրանյութերի տարածում եւ այլն:

Armenian Power-ը ձեւավորվել է  Լոս Անջելեում 1980-ականներին` Հայաստանից ներգաղթածներից: Նախնական նպատակը եղել է լատինաամերիկյան փողոցային խմբավորումներից կազմակերպված պաշտպանվելը:

Ի դեպ, մեղադրական եզրակացությունում հատուկ նշվում է հայկական եւ մեքսիկական մաֆիաների սերտ կապերի մասին: