Մանկապիղծներին ամորձատում են

Մանկապղծությունը պետք է պատժվի դրակոնյան ձեւով. այսօրվա ԱԺ նիստում հայտարարեց Վիկտոր Դալլաքյանը: Նա մեջբերեց մամուլի հրապարակումներ, որոնք վերաբերում են մեր երկրում մանկապղծության գրեթե անպատժելիությանը:

Դատական դեպարտամենտի տվյալներով` 2009 թվականին սեռական հանցագործությունների զոհ է դարձել 100 անչափահաս, եւ սա միայն սառցակտորի երեւացող մասն է: Նման հանցագործություններն ունեն լատենտային բնույթ, այսինքն` հաճախ հենց ծնողներն են թաքցում դեպքը` հասարակությունում իրենց երեխային «չանվանարկվելու» համար:

Այս հանցագործությունների հեղինակները պատժվում են քրեական օրենսգրքի 141-րդ հոդվածով, որով սահմանված պատիժը 100 հազար դրամ տուգանքն է եւ մինչեւ 2 տարի ազատազրկումը:

Սակայն Վիկտոր Դալլաքյանը ԱԺ նիստում հանդես եկավ առաջարկությամբ, որ տուգանք պատժաձեւը հանվի հոդվածից, իսկ ազատազրկման չափը սահմանվի 3-5 տարի:

Վ. Դալլաքյանը նշեց նաեւ, որ եվրոպական մի շարք երկրներում, ինչպեսեւ ԱՄՆ ինը նահանգներում, բացի ազատազրկումից,  հանցագործին քիմիական կամ ֆիզիկական ճանապարհով ամորձատում են: Սա այն դեպքն է, երբ մեղավորները պետք է իրենց արարքին համապատասխան պատժվեն: