Պատգամավորն առաջարկում է ամորձատել մանկապիղծներին եւ ծերերի հանդեպ սեռական ոտնձգություն անողներին

ԱԺ պատգամավոր Վիկտոր Դալլաքյանը կառավարության հետ ավանդական հարցուպատասխանի ժամանակ անդրադարձավ վերջերս երիտասարդների կողմից տարեցների հանդեպ սեռական բռնություն գործադրելու դեպքերին:

«Առաջարկում եմ, որ օրենսդրության մեջ նոր մոտեցում մտցվի, որով մանկապիղծների և մեծահասակների հանդեպ սեռական բնույթի բռնություն գործադրողների՝ սեռական մոլագարների նկատմամբ սահմանվի ամորձատում, ինչպես շատ եվրոպական երկրներում։ Ի՞նչ կարծիք ունի այս մասին կառավարությունը»,- հարցրեց անկախ պատգամավորը` ներկայացնելով այն երկրները, որտեղ կիրառվում է այդ օրենքը:

Վիկտոր Դալլաքյանի հարցին պատասխանեց արդարադատության նախարար Հրայր Թովմասյանը` նշելով, որ իրենք պատրաստ են իրավական դաշտում քննարկել այդ մեթոդի կիրառման արդյունավետությունը: Նախարարը նշեց, որ այս հարցն ավելի շատ բարոյական է, և պետք է ուշադրություն դարձնել, թե որտեղ եւ ինչ միջավայրում են մեծացել տվյալ անձինք, որտեղ է եղել բացթողումը: