ՀԱՅԿԱԿԱՆ ԺԱՄԱՆԱԿ. Նախարարի "խոպանը"

Առողջապահության համակարգում, ինչպես նաեւ քաղաքական շրջանակնելորւմ տեւական ժամանակ խոսվում էր, որ Հարություն Քուշկյանը մի կլինիկա էլ Սոչիում ունի: Ավելին` «ՀԺ»-ի 2010-ի նոյեմբերի 13-ի համարում մենք գրել էինք, որ, ըստ հավաստի տեղեկություններ, Հարություն Քուշկյանը այդ օրերին այցելել էր Սոչի եւ մասնակցել իր նորակառույց հիվանդանոցի բացմանը, սակայն նախարարի այցը եւ նրա նոր բիզնեսի շահագործումը գաղտնի է պահվել:

Ըստ մեր տեղեկությունների՝ Սոչիի իր հիվանդանոցում գործերը կարգավորելու համար առողջապահության նախարարն օրերով այնտեղ է գործուղում իրեն պատկանող «Էրեբունի» և «Նաիրի» բժշկական կենտրոնների վարիչներին: Այն, որ ՀՀ առողջապահության նախարարը թաքնված օլիգարխ է, մենք մի անգամ արդեն գրել ենք:

2007-ի խորհրդարանական ընտրությունների ժամանակ նրա կողմից Կենտրոնական ընտրական հանձնաժողով ներկայացված հայտարարագրում նշված է, որ Քուշկյանը առանձնատներ ունի Նորքում, հանգստյան գոտի` Դիլիջանում, բաժնետոմսեր` «Դուբրավա» ՍՊԸ-ում և «Հարտիգս» հանրապետական մանկական վերականգնողական կենտրոնում, նրան է պատկանում Նոր Նորքի «Արմա» հյուրանոցային համալիրը և այլն, և այլն:

Եթե հիշենք նաև ժամանակին (2009թ.) Վերահսկիչ պալատի կողմից առողջապահության նախարարությունում հայտնաբերված միլիոնավոր դրամների չարաշահումները և այն բոլոր դժգոհությունները, որ կան ՀՀ առողջապահության համակարգում, բոլոր հարցերը, թե որտեղից Հարություն Քուշկյանին այդքան փող, որ Սոչիում էլ է կլինիկա բացել, կարելի է փակված համարել: Ամբողջ խնդիրն այն է, սակայն, որ Քուշկյանը նման միակ հայ պաշտոնյան չէ: Իշխող կոալիցիան ներկայացնող գրեթե բոլոր պաշտոնյաներն էլ խոշոր կապիտալ ունեն արտասահմաններում` սկսած բիզնեսից, վերջացրած առանձնատներով: