Դրական բան` վեճի մեջ

Մյունխենի «Բավարիա»-ի նախագահ Ֆրանց Բեկենբաուերը կարողացել է թիմի ֆուտբոլիստներ Արիեն Ռոբենի և Թոմաս Մյուլերի վեճի մեջ անգամ դրական բան տեսնել, այս մասին տեղեկացնում է «Sport1.de»-ն:

Ռոբենին դուր չէր եկել Մյուլերի պահվածքը Գերմանիայի առաջնության 20-րդ տուրի «Վերդերի» հետ խաղի ժամանակ: Հանդիպումն ավարտվել էր մյունխենցիների օգտին` 3:1: Երկրորդ խաղակեսի ժամանակ հոլանդացի կիսապաշտպանը Գերմանիայի հավաքականի հարձակվողի կոկորդից էր բռնել այն բանից հետո, երբ գերմանացին ժեստերով ցույց էր տվել, թե Ռոբենը չպետք է խաղադաշտում եսասիրաբար գործի:

«Ւնձ համար այս կոնֆլիկտում դրական բան կա. կատարվածը վկայում է, որ թիմն ապրում է, խաղացողները շփվում են միմյանց հետ: Իմ ժամանակ խաղադաշտում ֆուտբոլիստների վեճերը սովորական էին և օրինաչափ: Այդ ամենը խաղի անբաժանելի մասն է»,- ասել է Բեկենբաուերը: