Մեղադրանք վհուկներին

Հայիթիի Կապի եւ մշակույթի նախարարության տարածած հայտարարության համաձայն` Հայիթիում սպանվել է 45 մարդ: Նրանք մեղադրվում են խոլերայի վարակը կախարդանքով տարածելու համար:

Նախարարության մամուլի խոսնակ Մոիս Ֆրից Էվենսը տեղեկացրել է, որ այդ մեղադրանքով միայն Grand'Anse շրջանում ժողովուրդը 40 մարդ է սպանել: Սպանվողների թվում նաեւ բուժակներ կան: Նույն մեղադրանքով 5 հոգի էլ սպանվել է կղզու այլ մասերում:

«Վհուկության մեջ մեղադրվող անձանց նախ սպանել են քարերով ու փայտերով, հետո դիակներն այրել փողոցներում», -տեղեկացրել է մամուլի խոսնակը:

Իսկ նախարարը հավելել է, որ վարակի տարածումը վհուկների կախարդանքի հետ կապ չունի, որ վարակը կանխելու համար անհրաժեշտ է խոլերայի դեմ պայքարի մասին պատշաճ կերպով իրազեկել հանրությանը:

Հիշեցնենք, որ Հաիթիում խոլերայի համաճարակից արդեն 2.591 մարդ է մահացել, իսկ բուժում է ստանում 121.518 հոգի: