168 ԺԱՄ. Թայմ աութ

Մեր տեղեկություններով ՀՀ նախագահ Սերժ Սարգսյանն ու ԲՀԿ ղեկավար  Գագիկ Ծառուկյանը «թայմ աութ» են վերցրել: Հիշեցնենք, որ շրջանառվող խոսակցությունների համաձայն` Ս. Սարգսյանը Գ. Ծառուկյանին վերջնագիր էր ներկայացրել, որպեսզի նա հրապարակավ հայտարարի, թե 2013 թ. ընտրություններում ում թեկնածությունն է պաշտպանելու:

Վերջին օրերին մամուլում ավելի շատ է խոսվում այն մասին, որ ԲՀԿ-ն դուրս է գալու կոալիցիայից: Գ. Ծառուկյանը փորձում է այդ ժամկետը հնարավորինս երկրաձգել: Մեր տեղեկություններով` դեկտեմբերի 18-ին  ՀՀԿ-ի 20-ամյակին նվիրված միջոցառման ավարտին նեղ շրջանակում Գ. Ծառուկյանը խմել է Ս. Սարգսյանի կենացն ու ասել` «մեր գլխից անպակաս լինի»: Իշխանական շրջանակներում դա մեկնաբանում են որպես խոստովանություն, բայց կարճ ժամանակահատվածի համար:

Այս օրերին մերձիշխանական կուլիսներում երկու հնարավոր սցենար է շրջանառվում`  կապված «Բարգավաճ Հայաստան» կուսակցության հետ: Իշխող են այն տեսակետները, թե ԲՀԿ-ն կոալիցիայից դուրս կգա փետրվար ամսին, ինչը կհամընկնի ԱԺ գարնանային նստաշրջանի մեկնարկի հետ:

Մյուս տեսակետի համաձայն` ԲՀԿ-ն կարողացել է համաձայնություն ձեռք բերել եւ մինչեւ 2011թ. ավարտը կմնա կոլաիցիայի կազմում: Նշենք նաեւ, որ երեկ երեկոյան ԲՀԿ-ն կոալիցիոն մյուս գործընկերների` ՀՀԿ-ի ու ՕԵԿ-ի հետ միասին ամանորյա ճաշկերույթի էր մասնակցում «Օջախ» ռեստորանում: