Թուրքիան դարձյալ խուճապի մեջ է

Երեկ լուրեր տարածվեցին, որ ԱՄՆ Կոնգրեսի Ներկայացուցիչների պալատի խոսնակ Նենսի Փելոսին առաջիկա 48 ժամվա ընթացքում պատրաստվում է Հայոց ցեղասպանության վերաբերյալ թիվ 252 բանաձն ընդգրկել Կոնգրեսի լիագումար նիստի օրակարգում:

Փաստը դարձյալ խուճապ է առաջացրել թուրքական դիվանագետների շրջանում:

Թուրքիայի արտգործնախարար Ահմեդ Դավութօղլուն զանգահարել է ԱՄՆ պետքարտուղար Հիլարի Քլինթոնին եւ խնդրել միջամտել ու կանխել Ցեղասպանության բանաձեւի հնարավոր ընդունումը։ ԱՄՆ պետքարտուղարը Դավութօղլուին վստահեցրել է, որ Հայոց ցեղասպանության հարցի առնչությամբ Վաշինգտոնի դիրքորոշումն անփոփոխ է եւ խոստացել անել հնարավորինը Ներկայացուցիչների պալատում բանաձեւի ընդունումը կանխելու համար։

«Մենք սկզբից ի վեր բանաձեւին դեմ էինք, եւ կանխելու համար հնարավոր ամեն ինչ կանենք, մի կասկածեք»,- ասել է Քլինթոնը:

Թուրքական լրատվամիջոցները դարձյալ մեղադրում են հայկական սփյուռքին ու ԱՄՆ-ի Հայ Դատի գրասենյակին` Միացյալ Նահանգների վրա ճնշում գործադրելու համար: Չի բացառվում, որ բանաձեւը Կոնգրեսի լիագումար նիստի օրակարգում կընդգրկվի երեքշաբթի օրը` դեկտեմբերի 21-ին: