Բանտում հրդեհ է բռնկվել

Այսօր Չիլիի իշխանությունները տեղեկացրել են, որ «Սան Միգել» բանտում տեղի ունեցած խռովության արդյունքում հրդեհ է բռնկվել, որի հետևանքով 81 բանտարկյալ մահացել է, իսկ առնվազն 14-ը՝ վիրավորվել:

Բանտի ոստիկանապետ Լուիս Մասֆերերը տեղեկացրել է, որ կրակը բռնկվել է առավոտյան ժամը 5:30-ի կողմերը և երեք ժամ հետո է հանգցվել:

Չնայած որ բանտը կառուցված է եղել 700 բանտարկյալների համար, դեպքի պահին բանտում 1.900 բանտարկյալ է եղել:

Իշխանությունները չեն պարզաբանել, թե ինչու են այդքան շատ բանտարկյալներ մահացել կամ որքան ժամանակում են հրշեջները մուտք գործել բանտի այն հատվածը, որտեղ տեղի է ունեցել դեպքը:

Առողջապահության նախարարը տեղեկացրել է, որ մեկ հրշեջ և երեք հսկիչներ էլ են վիրավորվել, սակայն նրանք ավելի թեթև վնասվածքներ են ստացել, քան 14 բանտարկյալները, ում այրվածքներն այնքան խորն են եղել, որ նրանց ճակատագիրը դեռ անորոշ է: