Վայոց Ձորից Մեղրի... դատարկություն է

Հայաստանի իշխանությունները պետք է անհապաղ ուշադրություն դարձնեն բնակչության տարաբնակեցման խնդրին:

Այս մասին, ըստ «Նոյյան Տապանի», հայտարարեց ճարտարապետ Հրաչ Պողոսյանը:

Նա նշեց, որ մոտ 3 մլն բնակչություն ունեցող երկրում 2 մլն-ը բնակվում է Երևանում, 600 հազարը` հանրապետության հյուսիսային ու արեւմտյան մասում, և միայն 200 հազարն է բնակվում հարավային` Սյունիքի և Վայոց Ձորի, տարածքում, ինչը նշանակում է, որ Վայոց Ձորից Մեղրի «դատարկություն» է: «Դա վտանգավոր բան է, դա ազգային անվտանգության խնդիր է, հատկապես՝ եթե հաշվի առնենք, որ դեմոգրաֆիական իրավիճակն այնպիսին է, որ անընդհատ արտահոսք կա Հայաստանից Ռուսաստան, կամ այլ երկրներ: Մի մասն էլ մարզերից գալիս է Երևան, և ստեղծվում է մի աննորմալ իրավիճակ, երբ վտանգված են մեր հեռավոր շրջանները, Սյունիքն, օրինակ, որը մի կողմից հարում է Ադրբեջանին մյուս կողմից` Նախիջևանին»,- ասաց Հրաչ Պողոսյանը:

Նա նշեց, որ 1988-ի երկրաշարժից հետո կազմվել է և 2000-ին կառավարության հավանությանն արժանացել «Բնակչության տարաբնակեցման նախագիծ»-ը, որին սակայն ընթացք չի տրվել: