Պայծառակերպության և Վարդավառի տոնը նշվեց Թբիլիսիում և Վրաստանի հայկական համայնքներում

Հուլիսի 12-ին Հայ Առաքելական Սուրբ Եկեղեցին նշեց իր հինգ տաղավար տոներից մեկը՝ Տիրոջ Պայծառակերպության տոնը՝ Վարդավառը։ Տոնական արարողություններ անցկացվեցին ոչ միայն Հայաստանում, այլև աշխարհի տարբեր երկրներում, այդ թվում՝ Վրաստանի հայկական համայնքներում։

Այսօր Վարդավառը քրիստոնեական տոն է՝ նվիրված Հիսուս Քրիստոսի Պայծառակերպությանը։ Սակայն դրա արմատները հասնում են նախաքրիստոնեական ժամանակներին։ Սկզբնապես այն կապված էր սիրո և գեղեցկության աստվածուհի Աստղիկի պաշտամունքի հետ, իսկ Հայաստանի կողմից քրիստոնեությունը պետական կրոն ընդունելուց հետո՝ 301 թվականին, տոնը ստացավ նոր քրիստոնեական բովանդակություն։ Ավետարանի համաձայն՝ այդ օրը Հիսուս Քրիստոսը Թաբոր լեռան վրա պայծառակերպվեց իր աշակերտների առջև՝ ցույց տալով Իր աստվածային փառքը։

Թբիլիսիի առաջնորդանիստ Սուրբ Գևորգ եկեղեցում տոնական Սուրբ և Անմահ Պատարագ մատուցեց Վիրահայոց թեմի առաջնորդ Գերաշնորհ Տեր Կիրակոս եպիսկոպոս Դավթյանը։

Իր քարոզում Սրբազանը խոսեց տոնի հոգևոր խորհրդի մասին՝ ընդգծելով, որ Պայծառակերպությունը հաստատում է Հիսուս Քրիստոսի աստվածային էությունը և հավատացյալներին կոչ է անում ապրել Աստծո պատվիրաններով, պայծառակերպվել Քրիստոսի լույսով, հարստացնել կյանքը հոգևոր արժեքներով, բարի գործերով, ողորմածությամբ և ներողամտությամբ։

Սուրբ Պատարագից հետո տոնական միջոցառումները շարունակվեցին եկեղեցու բակում։ Վարդավառի ամենահայտնի ավանդույթը՝ միմյանց ջրով ցողելը, որը պահպանվել է նախաքրիստոնեական ժամանակներից և քրիստոնեական ընկալմամբ խորհրդանշում է մաքրություն, նորոգություն և Աստծո օրհնությունը, համախմբեց երեխաներին ու մեծահասակներին, տեղացիներին և զբոսաշրջիկներին։ Երաժշտության ու երգերի ուղեկցությամբ մասնակիցները միացան նաև ավանդական շուրջպարին։

Պայծառակերպության և Վարդավառի տոնական արարողություններ ու միջոցառումներ անցկացվեցին նաև Բաթումիի «Սուրբ Փրկիչ», Ախալցիխեի «Սուրբ Գրիգոր Լուսավորիչ», Ախալքալաքի «Սուրբ Խաչ», Նինոծմինդայի «Սուրբ Սարգիս» եկեղեցիներում, ինչպես նաև Ծալկայի շրջանի հայաբնակ գյուղերում։

Վարդավառը շարունակում է մնալ հայ ժողովրդի ամենասիրված տոներից մեկը՝ միավորելով դարավոր ազգային ավանդույթներն ու քրիստոնեական հոգևոր ժառանգությունը։

Աղբյուրը՝ vectornews.ge-ի