ԵԱՏՄ-ԱՄԷ տնտեսական գործընկերության համաձայնագիրը հոկտեմբերի 6-ից ուժի մեջ է մտել

Հոկտեմբերի 6-ին ուժի մեջ է մտել Եվրասիական տնտեսական միության (ԵԱՏՄ) և դրա անդամ պետությունների՝ մի կողմից, և Արաբական Միացյալ Էմիրությունների՝ մյուս կողմից, տնտեսական գործընկերության մասին համաձայնագիրը, որը ստորագրվել էր 2025 թվականի հունիսին։

Համաձայնագիրը նախատեսում է առևտրային ռեժիմի էական ազատականացում։ ԱՄԷ-ն արտոնյալ շուկա մուտք գործելու հնարավորություն է տրամադրել ԵԱՏՄ ապրանքների անվանացանկի 86%-ի համար, որը համապատասխանում է ԵԱՏՄ արտահանման ծավալի 98%-ին։

Եվրասիական տնտեսական հանձնաժողովի առևտրի նախարար Անդրեյ Սլեպնևի խոսքով՝ ԵԱՏՄ երկրների ապրանքների նկատմամբ ԱՄԷ-ում կիրառվող միջին մաքսատուրքը 5%-ից կնվազի մինչև 0,6%։ Նրա գնահատմամբ՝ դա ԵԱՏՄ երկրների արտահանողներին տարեկան թույլ կտա մինչև 266 մլն դոլար խնայել մաքսատուրքերի վճարումից։

Սլեպնևը նաև նշել է, որ միջնաժամկետ հեռանկարում ակնկալվում է առևտրաշրջանառության առնվազն 5-6 մլրդ դոլարի աճ։

Համաձայնագիրը նախատեսում է նաև գործարար շրջանակների, այդ թվում՝ փոքր և միջին ձեռնարկությունների միջև համագործակցության զարգացում, ինչպես նաև տրանսպորտի և լոգիստիկայի ոլորտներում համագործակցություն՝ ԱՄԷ-ին «Հյուսիս-Հարավ» միջազգային միջանցքին միանալու հնարավորությամբ։

ԵԱՀ առևտրի նախարարը ԵԱՏՄ երկրների գործարարներին կոչ է արել ակտիվորեն օգտվել նոր հնարավորություններից և զարգացնել համագործակցությունն էմիրաթական կողմի հետ։