Փարիզի քաղաքային խորհուրդը ԼՂ նախկին առաջնորդների «դատը» դատապարտող կոչ է ընդունել

Փարիզի քաղաքային խորհուրդը Լեռնային Ղարաբաղի նախկին առաջնորդների կեղծ դատավարությունը դատապարտող կոչ է ընդունել։ Տեղեկությունը հայտնում է Ֆրանսիայում ՀՀ դեսպանությունը։

«Այսօր Փարիզի քաղաքային խորհուրդը միաձայն ընդունել է «Ադրբեջանում ձերբակալված ԼՂ նախկին առաջնորդների մտահոգիչ իրավիճակի վերաբերյալ» կոչ, որում հղում է արվում քաղաքապետ Անն Իդալգոյի՝ Հայաստան կատարած այցերին և հայ ժողովրդի հետ վերջինիս անմնացորդ համերաշխությանը, վերաhաստատվում է Փարիզի քաղաքային խորհրդի լիակատար աջակցությունը Հայաստանին և հայ ժողովրդին»,– ասված է հաղորդագրությունում։

Նշված կոչով, անդրադառնալով ԼՂ նախկին առաջնորդների ձերբակալման հանգամանքներին, Ադրբեջանում նրանց պահման պայմաններին և նրանց դեմ առաջադրված շինծու մեղադրանքներին` Փարիզի քաղաքային խորհուրդը դատապարտում է ԼՂ նախկին առաջնորդների ապօրինի ձերբակալությունը և կեղծ դատավարությունները։ Փարիզի քաղաքային խորհուրդը պահանջում է նաև վերջինների ազատ արձակումը»,– ասված է հաղորդագրությունում։

Կոչը Փարիզի քաղաքային խորհրդի քվեարկությանն է ներկայացրել քաղաքապետի տեղակալ Առնո Նգաչան։

Հիշեցնենք, որ հունվարի 17-ից Ադրբեջանում ընթանում է Արցախի նախկին ռազմաքաղաքական առաջնորդների գործով «դատավարությունը»: Մեղադրյալների թվում են նախկին նախագահներ Արկադի Ղուկասյանը, Բակո Սահակյանը, Արայիկ Հարությունյանը, պաշտպանության բանակի նախկին հրամանատար Լևոն Մնացականյանը, նախկին արտգործնախարար Դավիթ Բաբայանը և այլք:

Նախկին պետնախարար և բարերար Ռուբեն Վարդանյանի գործը քննվում է առանձին վարույթով: Չնայած գործի նյութերը մյուսների հետ միավորելու նրա խնդրանքին` դատարանը որոշել է 422 հատորներից 400-ը դիտարկել առանձին: