Բելառուսում մեկնարկել են նախագահական ընտրությունները

Այսօր՝ հունվարի 26-ին, Բելառուսում նախագահական ընտրություններ են անցկացվում։

Հունվարի 21-ից 25-ը տեղի է ունեցել վաղաժամկետ քվեարկություն։ Բելառուսի Հանրապետության նախագահի ընտրություններում վաղաժամկետ քվեարկել է ընտրացուցակներում ընդգրկված քաղաքացիների 41,81%-ը։

Երկրի տարածքում բացվել է 5325 ընտրատեղամաս։ Դրանք այսօր աշխատելու են տեղական ժամանակով 08:00-ից 20:00-ը։

Քվեաթերթիկում ընդգրկված է հինգ թեկնածու։ Ակնկալվում է, որ նախագահական ընտրություններում կհաղթի երկրի գործող նախագահ Ալեքսանդր Լուկաշենկոն։

Քվեաթերթիկները տպագրված են բելառուսերեն, հայտնում է Belta-ն։

Այսօր՝ ընտրությունների հիմնական օրը, քարոզչությունն արգելված է օրենքով։

Բելառուսում նախագահական ընտրությունների արդյունքները Կենտրոնական ընտրական հանձնաժողովը կսահմանի փետրվարի 5-ից ոչ ուշ, հայտարարել է երկրի ԿԸՀ նախագահ Իգոր Կարպենկոն։