Թուրքերը որոշել են վերականգնել Մարութավանքը

Պաշտոնապես ներկայիս Թուրքիայի Հանրապետության սահմաններում գտնվող Բաթման նահանգի Սասուն գավառի Մարութա լեռան գագաթին կառուցված հայկական Բարձր Աստվածածին վանքը վերականգնելու որոշում է կայացվել։ Այդ մասին հայտնել է Բաթմանի նահանգապետ Էքրեմ Ջանալփը։

Akunq.net-ի համաձայն՝ Բաթմանի նահանգապետը նշել է, որ 2973 մ բարձրություն ունեցող Մարութա լեռան հայկական եկեղեցին վերանորոգելու է Հատուկ վարչության գլխավոր քարտուղարությունը։

Թուրք նահանգապետը նաև հայտնել է եկեղեցու և ճանապարհների վերանորոգումից հետո Բաթմանը Հասանքեյֆի նման՝ տեղացի և արտասահմանցի տուրիստների համար զբոսաշրջության վայր դարձնելու իրենց մտադրության մասին։

Հիշեցնենք, որ Մարութա կամ Մարաթուկ լեռան Բարձր Աստվածածին հայկական վանքը եղել է Սասունի նշանավոր ուխտավայրը։ Ըստ «Սասնա ծռեր» էպոսի՝ Մարութավանքը կառուցել են Սանասարն ու Բաղդասարը, վերակառուցել՝ Դավիթը։ Վանքը բաղկացած էր փոքր, միանավ եկեղեցուց, շրջապատված՝ ուղղանկյուն հատակագծով, անմշակ քարերից շարված պարսպով:

https://www.batmancagdas.com/ermeni-kilisesine-restorasyon

Թարգմանեց Մելինե Անումյանը

Akunq.net