Նորմալ հարաբերություններ Արևմուտքի հետ, բայց ոչ՝ ՌԴ-ի հետ թշնամանքի հաշվին. Անդրանիկ Թևանյան

«Հայաստանի նորմալ գործընկերային հարաբերություններն Արևմուտքի հետ չպետք է լինեն Ռուսաստանի հետ թշնամանք հաշվին»։ Այս մասին Sputnik Արմենիա մուլտիմեդիոն կենտրոնում հայտարարեց «Մայր Հայաստան» դաշինքի ղեկավար Անդրանիկ Թևանյանը։

Նրա խոսքով՝ ոչ մի պարագայում չպետք է թույլ տալ, որ Հայաստանում տեղի ունենա այն, ինչ տեղի ունեցավ Ուկրաինայում 2014 թ.–ին կամ Վրաստանում 2008 թ–ին։

«Այս երկրները օգտագործվեցին, որպես մանրադրամ Ռուսաստանի դեմ պայքարում։ Մենք դեմ ենք, որպեսզի Հայաստանը օգտագործվի, այսինքն` այն ինչ հիմա է տեղի ունենում։ ՀՀ իշխանությունների վարած քաղաքականությունը բերում է նրան, որ մենք դառնում ենք աշխարհաքաղաքական բախումների թատերաբեմ, բայց դա որևէ պարագայում չի կարելի թույլ տալ»,– ասաց Անդրանիկ Թևանյանը։

Անդրանիկ Թևանյանը հավելեց, որ իրենց քաղաքական ուժը, ո՛չ ռուսամետ է , ո՛չ արևմտամետ ու ոչ էլ` հակառուսամետ ու հակաարևմտամետ։ Նա վստահեցնում է, որ պետք է միայն ՀՀ-ի շահերը պաշտպանել։

«Մեր ռազմավարական դաշնակցային գործընթացը Ռուսաստանի հետ հենց այդ տրամաբանության շրջանակներում է»,– հավելեց նա։

Անդրադառնալով իր գլխավորությամբ պատվիրակության այցին Լուգանսկ ու Դոնեցկ նա նշեց, որ այցերը եղել են աննախադեպ` նախկին ԽՍՀՄ մասշտաբով, քանի որ որևէ երկրից պաշտոնական պատվիրակություն դեռ չէր եղել այնտեղ։

«Մենք մեր այցով ցույց տվեցինք, որ որևէ պարագայում չենք պատկերացնում թշնամություն անել Ռուսաստանի հետ, ցույց տվեցինք Ռուսաստանին` ինչպես ենք պատկերացնում գործընկերությունը»,– ասաց Թևանյանը։

Հիշեցնենք, որ «Մայր Հայաստան» դաշինքի պատվիրակությւոնը, Անդրանիկ Թևանյանի գլխավորությամբ, այցելել է Դոնեցկի և Լուգանսկի Ժողովրդական Հանրապետություններ։ Նրանք տարածաշրջանի համար մարդասիրական օգնություն էին տարել` արյան փոխներարկման կայանի համար նախատեսված դեղորայք, գրքեր, սննդամթերք։ Պատվիրակությունը հանդիպումներ է ունեցել տարբեր պաշտոնյանների, ինչպես նաև տեղի հայ համայնքի ներկայացուցիչների հետ։