40.000-անոց Չարենցավանի անձնագրային բաժինը տեղափոխվել է Հրազդան. բնակիչները բողոքում են

ՆԳՆ Միգրացիայի և քաղաքացիության ծառայության ձևավորմամբ ու համակարգում իրականացվող օպտիմալացման համատեքստում մարզերում ու տարբեր բնակավայրերում կրճատվում են անձնագրային բաժինները։

Անձնագրային ծառայությունների օպտիմալացման գործընթացը հասել է Կոտայքի մարզ: Տևական ժամանակ է Չարենցավանի անձնագրային բաժանմունքը փակ է, ինչի հետևանքով Չարենցավան խոշորացված համայնքի բնակիչներն իրենց անձնագրային խնդիրները լուծելու համար ստիպված  պետք է գնան Հրազդան:

Չարենցավանցիներն այսօր կառավարության շենքի դիմաց էին, իրենց բողոքի ձայնն էին բարձրացնում։ Նրանք պնդում են, որ 40 հազար բնակչություն ունեցող քաղաքի անձնագրայինը տեղափոխելը Հրազդան ոչ միայն անհարամարություններ է պատճառում բնակիչներին, այլ նաև խառնաշփոթ է առաջացնում հենց անձնագրայինում:

«Մեզ այստեղ է բերել ՆԳ նախարար Վահե Ղազարյանի հունվարի 12-ի հրամանը, որով անձնագրային բաժինները օպտիմալացվել և միացվել են իրար: Ամբողջ անձնագրային բաժիններում խառնաշփոթ են: Չարենցավանի բաժինը տեղափոխվել է Հրազդան, որն առաջացրել է 40 հազար բնակչություն ունեցող խոշորացված Չարենցավան համայնքի բնակիչների զայրույթը»,- լրագրողների հետ զրույցում ասաց ակցիայի մասնակից Գևորգ Հակոբյանը:

Նա նշեց, որ 8,000-ից ավելի ստորագրությամբ նամակ են մուտք արել կառավարություն՝ վարչապետին խնդրելով, որ ետ վերադարձնեն անձնագրային բաժանմունքը, մեկ նամակն էլ հանձնելու են ոստիկանություն:

«Անձնագրայինը Հրազդան տեղափոխելուց հետո 130 հազար բնակչությանը՝ Հրազդանից, Չարենցավանից ու Ծաղկաձորից, սպասարկում է մի փոքրիկ 140 քմ տարածք: Առավոտը ժամը վեցից գոյանում են հերթեր, ահավոր վիճակ է ստեղծվում, գնալ գալը նույնպես խնդիր է: Հազարավոր քաղաքացիներ խնդիր ունեն անձնագրային և ամեն անգամ Հրազդան հասնելը նաև լրացուցիչ ֆինանսական ծանրաբեռնվածություն է առաջացնում, մարդիկ ինչի՞ համար պետք է մի քանի անգամ գնան Հրազդան ու ավելորդ բեռի տակ ընկնեն»,- նշեց նա: