Եթե գրավի ողջամիտ չափի լինի՝ մինչև 5 մլն, կվճարենք․ ավելին չեմ կարող․ Տիրան Խաչատրյան

Կոտայքի մարզի ընդհանուր իրավասության դատարանը՝ դատավոր Դիանա Ղուկեյանի նախագահությամբ, հեռացել է առանձին սենյակ՝ ՀՀ ԶՈՒ ԳՇ պետի նախկին տեղակալ Տիրան Խաչատրյանի խափանման միջոցի վերաբերյալ որոշում կայացնելու։

Նշենք, որ հանրային մեղադրողը միջնորդեց անփոփոխ թողնել Տիրան Խաչատրյանի խափանման միջոցը՝ երկարացնելով ժամկետը, ինչը պաշտպանների գնահատմամբ հիմնավոր չէ։ Պաշտպանության կողմը միջնորդել է Խաչատրյանի նկատմամբ ընտրված խափանման միջոց կալանավորումը վերացնել, փոխարինել անազատության հետ չկապված խափանման միջոցով, այդ թվում՝ գրավով։ Պաշտպան Վարազդատ Հարությունյանն ընդգծեց՝ կալանավորման հիմքեր առկա չեն։

Գրավի չափը պաշտպանության կողմը թողեց դատարանի հայեցողությանը՝ խնդրելով սահմանել ողջամիտ չափ։ Տիրան Խաչատրյանն ինքը նշեց, որ եթե գրավը ողջամիտ սահմաններում լինի, կկարողանան վճարել․

«Պաշտպանության կողմը նշեց՝ երկու մլն և ավելին, բայց և ավել լինելը չի նշանակում՝ 15, 20 մլն դրամ։ Ես այդքան չունեմ։ Մինչև 5 մլն»։

Դատարանը խափանման միջոցի վերաբերյալ որոշումը կհրապարակի մարտի 4-ին։