Մշակութային հաստատությունները պետք է զերծ պահել նման բաներից․ Ժաննա Անդրեասյանը՝ Գինոսյանի վերջին հրաժեշտը Օպերայում չկազմակերպելու մասին

ԿԳՄՍ նախարար Ժաննա Անդրեասյանը այն կարծիքին է, որ մշակութային օջախները լավագույն վայրերը չեն հոգեհանգստի կազմակերպման համար։

«Ես գտնում եմ, որ մշակութային հաստատությունները պետք է հնարավորինս զերծ պահել, ամենայն հարգանքով ցանկացած գործչի վաստակի նկատմամբ, սա կապ չունի որևէ անձի հետ, ես չեմ գտնում, որ դրանք լավագույն վայրերն են հուղարկավորություն կազմակերպելու համար»,- կառավարության նիստից հետո լրագրողներին ասաց Ժաննա Անդրեասյանը՝ պատասխանելով հարցին, թե ինչո՞ւ Գագիկ Գինոսյանի հոգեհանգիստը չի կազմակերպվում Ա.Սպենդիարյանի անվան օպերայի և բալետի ազգային ակադեմիական թատրոնում։

Հիշեցնենք՝  «Կարին» ավանդական երգի-պարի խմբի հիմնադիր և գեղարվեստական ղեկավար, Հայաստանի մշակույթի վաստակավոր գործիչ և Արցախյան պատերազմի մասնակից Գագիկ Գինոսյանի հոգեհանգիստը տեղի կունենա այսօր Նոր-նորքի 5-րդ զանգվածում գտնվող Սուրբ Սարգիս եկեղեցում, վերջին հրաժեշտը՝ փետրվարի 9-ին Կամերային երաժշտության տանը։ Նա  կհուղարկավորվի «Եռաբլուր» զինվորական պանթեոնում։