Սրանից ավելի ուղիղ հնարավոր չէ ասել. պատգամավորի արձագանքը Միլլի մեջլիսի հայտարարությանը

ՀՅԴ Հայաստանի ԳՄ հանրային կապերի գարսենյակի պատասխանատու, ՀՀ ԱԺ «Հայաստան» խմբակցության պատգամավոր  Քրիստինե Վարդանյանը արձագանքել է Միլլի մեջլիսի հայտարարությանը.

«Փաշինյանենք մի քիչ էլ բանակցեն, Ադրբեջանին էլ բանակ պետք չի լինի:

Այսօր Ադրբեջանի Միլլի Մեջլիսը «Արևմտյան ադրբեջանցիների՝ իրենց պատմական հայրենիք վերադառնալու» մասին հայտարարություն է ընդունել: Սրանից ավելի ուղիղ հնարավոր չէ արտահայտել պետական քաղաքականության նպատակադրումները:

Ու պատկերացրեք` մեր կողմից ովքեր պետք է «դիմագրավեն» այս օրակարգին:

Ինչ ուզող այն էլ բանակցող, ցանկացած բարենպաստ առաջարկից «բա իմ մասին ինչ կասեն» հիմնավորմամբ հրաժարվող, վերջում կապիտուլյացիա ստորագրող Փաշինյանը, բացառապես դաշնամուր նվագելու և դագաղի նկարվելու հետ ասոցացվող Վահագն Խաչատուրյանը, հայկական դիվանագիտության «դափնեպսակ» Արարատ Միրզոյանը և ՔՊ մնացած «պրոֆեսիոնալների» թիմը:

Մենք մի բան միայն պետք է գիտակցենք. Ադրբեջանն իր յուրաքանչյուր գործողությամբ միայն ապացուցում է, որ խնդիրը երբեք չի եղել Արցախը:

Այսքանից հետո գոնե մի քիչ հարգանք դրսևորեին իրենց այդքան ծառայություն մատուցած գործընկերոջ` Փաշինյանի նկատմամբ ու այսքան ակնհայտ ու հասկանալի ցույց չտային «խաղաղության դարաշրջան» կոչված կոնցեպտի ողջ կեղծությունը»:

Հիշեցնենք, որ այսօր Ադրբեջանի Միլի մեջլիսը հայտարարություն է ընդունել «արևմտյան ադրբեջանցիների»՝ իրենց «պատմական հայրենիք» վերադառնալու վերաբերյալ: Այս մասին հայտնում են տեղի լրատվամիջոցները:

Հայտարարության մեջ ընդգծվում է, որ վստահության ամրապնդման միջոցներից է «արևմտյան ադրբեջանցիների» վերադարձի ապահովումը իրենց «պատմական հողեր»։

Հայտարարության մեջ նշվում է, որ «ադրբեջանցիները դարեր շարունակ ապրել են ներկայիս Հայաստանի Հանրապետության տարածքում» և որ այնտեղ ապրող «բնակչության մեծամասնությունը ադրբեջանցիներ էին»։

«Համայնքի ներկայացուցիչները կարծում են, որ ներկայիս Հայաստանի տարածքում «արևմտյան ադրբեջանցիների»՝ «իրենց նախնիների հայրենիք» վերադառնալու իրավունքի ճանաչումն Ադրբեջանի և Հայաստանի միջև վստահության ձևավորման կարևորագույն գործիքներից է։ Սա կարևոր քայլ կլինի երկու պետությունների միջև իրական խաղաղության հասնելու և տարածաշրջանում համակեցության միջավայր ստեղծելու ուղղությամբ»,- ասված է հայտարարության մեջ։