ՏԵՍԱՆՅՈՒԹ․ Մեքենաները կանգնեցրել են, վթարային իրավիճակ ստեղծելով՝ փաստաթուղթ են ստուգում․ Թադևոս Ավետիսյան

«Դիմադրություն» շարժման ավտոերթի մասնակիցներին պարեկային ծառայության աշխատակիցները կանգնեցրին Արտաշատից եկող ճանապարհին ու անակնկալ որոշեցին ստուգել փաստաթղթերը՝ վթարային իրավիճակ ստեղծելով՝ հայտնում է Yerkir.am-ը։

Ավտոերթը գլխավորող՝ ՀՅԴ անդամ, ԱԺ «Հայաստան» խմբակցության պատգամավոր Թադևոս Ավետիսյանը պարեկների այս գործողությունը որակեց սադրանք։

«Ոստիկաններն իրենց գործողություններով փաստացի սադրեցին խաղաղ բողոքի ակցիայի մասնակիցներին և որոշեցինք դուրս գալ ավտոմեքենաներից և փակել ճանապարհը։ Սա բացառապես ոստիկանական ոչ համաչափ գործողությունների հետևանք է»,-հայտարարեց նա։

Թադևոս Ավետիսյանի գնահատմամբ՝ երթևեկելի մասում, որտեղ մեքենաները կանգնեցրել են և  վթարային իրավիճակ ստեղծելով՝ փաստաթուղթ են ստուգում անհասկանալի է և անընդունելի։

«Այնքան էլ շատ են՝ Աստված տվել, չի խնայել այս ծառայության մեքենաները։ Երթի մասնակիցներից ավելի շատ ոստիկանական մեքենաներ կան և անընդհատ ամբողջ ընթացքում խանգարում են երթին, ստեղծում պարբերաբար վթարային իրավիճակին։ Տեսախցիկները ֆիքսել են՝ թող իրենց ղեկավարները հետևություն անեն՝ այս ծառայությունը պիտի ժողովրդի անվտանգությո՞ւնն ապահովի, թե՞ վտանգ ստեղծի»,-ասաց Թադևոս Ավետիսյանը։

Ճանապարհը որոշ ժամանակ փակ պահելուց հետո ավտորեթի մասնակիցները շարունակեցին ճանապարհը։

Մանրամասն՝ տեսանյութում․