Իրանցի գործարարների շրջանում մեծ է հետաքրքրությունը Հայաստանում գործունեություն ծավալելու, սակայն առկա չէ բավարար տեղեկացվածություն. Աբգար Գոդար

Հայաստանի արդյունաբերողների և գործարարների միության նախագահ Արսեն Ղազարյանն ու ՀՀ-ում Իրանի Իսլամական Հանրապետության դեսպանության առևտրի կցորդ Աբգար Գոդարը քննարկել են Հհայ-իրանական առևտրատնտեսական համագործակցության առկա իրավիճակն ու զարգացման հեռանկարները, հայտնում են Հայաստանի արդյունաբերողների և գործարարների միությունից։

ՀԱԳՄ նախագահը հատկապես շեշտադրել է իրանական գործարարների մասնակցությամբ Հայաստանում համատեղ արտադրություններ հիմնելու կարևորությունը, որոնք կբավարարեն ոչ միայն տեղական, այլև արտերկրի շուկաներում առկա պահանջարկը։ Այս առումով լայն հեռանկարներ կան թե՛ ԵԱՏՄ շրջանակներում, թե՛ այլ տարածաշրջաններում, ինչին կնպաստի նաև Հայաստանի՝ որպես տարանցիկ երկրի դերակատարությունը։

Նա, մասնավորապես, կարևորել է այնպիսի ծրագրերի իրականացումը, ինչպիսիք են հայ-իրանական սահմանին ազատ տնտեսական գոտու գործունեությունը, նավթի վերամշակման ձեռնարկությունների հիմնումը, ճանապարհաշինական նախագծերը, Իրան-Հայաստան երկաթգծի կառուցումը։

ՀԱԳՄ նախագահն առաջարկել է առաջիկայում Երևանում կազմակերպել հայ-իրանական ներդրումային համաժողով՝ համագործակցության առկա ներուժը գործարարների մասնակցությամբ անմիջականորեն քննարկելու, գործնական հնարավորություններն ի մի բերելու նպատակով։

Աբգար Գոդարիի խոսքով՝ իրանցի գործարարների շրջանում մեծ է հետաքրքրությունը Հայաստանում գործունեություն ծավալելու առումով, սակայն, ըստ դիվանագետի, առկա չէ բավարար տեղեկացվածություն, կողմերը ծանոթ չեն եղած ներուժին, իրավական ու տնտեսական համակարգերին, ինչի ուղղությամբ աշխատանք կա անելու։ Այս առումով՝ նա արժևորել է Հայաստանի արդյունաբերողների և գործարարների միության գործունեությունը՝ որպես կապող և ուղղորդող օղակի։

«Մեր խնդիրն է գործարարներին փոխադարձ ծանոթացնել եղած տնտեսական ներուժին և, եթե բարդություններ են առաջացնում, աջակցել դրանց լուծմանը»,-նշել է ՀՀ-ում Իրանի դեսպանության առևտրի կցորդը։

Նա կարևորել է հայ-իրանական ներդրումային համաժողով կազմակերպելու առաջարկը։

Կողմերը պայմանավորվել են նման հանդիպումներ ունենալ պարբերաբար։