Լենինգրադյան փողոցում հայտնաբերված աղվեսը, հավանաբար, մոտակա խոտածածկ տարածքից էր մոլորվել

Լենինգրադյան փողոցի 48-րդ շենքի բակում հայտնաբերված աղվեսը մոտ մեկ տարեկան ձագ է եղել։ Շենքի բնակիչների ահազանգից հետո նրան տեղափոխել են վայրի բնություն։

Բնապահպանության եւ ընդերքի տեսչական մարմնի հետ զրույցում նշեցին, որ աղվեսի ձագը, ամենայն հավանականությամբ, մոտակա խոտածածկ տարածքներից է հայտնվել շենքի մոտ։

«Երեւանում աղվեսները շատ են, իրենք լինում են անտառային համալիրներում եւ երբեմն մոլորվում են։ Շատ են հայտնվում նկուղներում, աղբարկղների շուրջ, սեփական տների հավաբներում, որովհետեւ փորձում են սնունդ գտնել»,- նշեցին տեսչական մարմնից։

Տեսչական մարմնից հայտնեցին, որ մոլորված աղվեսների վերաբերյալ տարեկան մոտ 5-6 ահազանգ է ստացվում։ Բացի աղվեսներից, բնակելի վայրերում են հայտնվում նաեւ օձեր, կրիաներ, բազեներ, մարզերում՝ արջեր։