ՏԵՍԱՆՅՈՒԹ․ Միայն թուրքերն են ասում, որ Նժդեհը ֆաշիստ է, ասողներին պետք է տանել գենետիկական փորձաքննության․ Ա․ Սարիբեկյան

Անահիտ աստվածուհի, Տիգրան Մեծ, Գարեգին Նժդեհ, սվաստիկա․․․ Արծաթյա զարդերի «Անահիտ արվեստի անկյուն»  բրենդը շուկայում շատ արագ լայն ճանաչում ու պահանջարկ ստացավ հենց ազգայինով եւ հայկականով։ Բրենդի սեփականատեր Անահիտ Սարիբեկյանը Yerkir.am-ի հետ զրույցում շեշտում է՝ դրանք ուղղակի զարդեր չեն, դրանք գաղափարներ են, որոնք փոխանցվելու են սերնդեսերունդ։ Նա իր պարանոցին, օրինակ, Նժդեհի դիմապատկերով կախազարդ է կրում։

Դիտարկմանը, որ պետական օղակներով քարոզում են, թե Գարեգին Նժդեհը ֆաշիստ է, այսպես է արձագանքում․ «Նժդեհը ֆաշիստ է համարվել թուրքերի համար․ ով Գարեգին Նժդեհին ֆաշիստ է համարում, նրան պետք է գենետիկական փորձաքննության տանել: Մենք գիտենք՝ ով է Նժդեհը մեզ համար, իրենց խնդիրն է, թե ի՞նչ կխոսեն։ Հասկացողը հասկանում եւ գնահատում է։ Այդ հակաքարոզը գուցե ազդի պատանիների վրա, որոնք չունեն ձեւավորված արժեհամակարգ, հասուն մարդու մտքերը չեն կարող փոխել»:

Պատմելով իր փոքրիկ բիզնեսի ստեղծման մասին՝ Անահիտն ասաց, որ իրենց առջեւ խնդիր են դրել նաև կրթել հանրությանը:

«Ոչ թե ինչ-որ իմաստով, այլ  90 տոկոսով: Վերջին զարդը, որ ստեղծվել է, Անահիտ աստվածուհու եւ Տիգրան Մեծի պատկերով կախազարդերն են: Առաջինը Գարեգին Նժդեհի պատկերով կախազարդն էր: Այս մոդելներն իրենց ձեւով տարբերվում են շուկայում առկա բոլոր զարդերից, շատ մեծ պահանջարկ ունեն, քանի որ շեշտը դրված է հենց հայկականի վրա: Ինչ ստեղծում ենք, մեջը գաղափար կա, տրվում է նաեւ զարդի նկարագրությունը, որպեսզի մարդիկ հասկանան դրանց իմաստը: Ունենք տիեզերքի մոդելը, որը շատ կարեւոր է մեզ համար ու պարտադիր է, որ մարդիկ կրելիս հասկանան, թե ինչ են կրում: Մենք գաղափար ենք փոխանցում սերնդեսերունդ եւ դրա համար ընտրել ենք ազնիվ մետաղը՝ արծաթը, որը հնանալ չունի  եւ պատրաստվում է բարձր որակով, որ ժառանգաբար փոխանցվի: Պիտի սերունդները չմոռանան մեր մեծերին՝ Տիգրան Մեծին, Նժդեհին, պատմություն ուսումնասիրեն եւ հասկանան՝ ով են նրանք եղել: Պատվիրատուներին միշտ հարցնում ենք՝ ի՞նչ գիտեք, օրինակ, սվաստիկայի մասին, եթե չգիտեն, պատմում ենք։ Մեզ համար կարեւոր է, որ գաղափարը տարածվի»,- ասաց Անահիտը։

Զրուցակիցս պատմեց, որ գործը սկսել է անցած տարվա ապրիլից՝ պատերազմից հետո, մի ժամանակահատվածում, երբ հանրության շրջանում հուսահատության հասնող մոտեցում կար, որ մենք ազգային գաղափարական մոտեցում չունենք առ հայրենիք, առ մշակույթ:  Չնայած այս տեսակետներին՝ ազգայինի պահանջարկը, ըստ Անահիտի, կա, գնում ու նվիրում են իրար՝ որպես գաղափար:

«Շատերը տիեզերքի իմաստը չգիտեն, երբ պատմում ենք, աչքերը փայլում են: Հասկանում ես, թե որքան կարեւոր է մարդկանց բացատրել, թե ով են եւ որտեղից են գալիս: Մեր հասարակության վրա մեծ քարոզչություն է գնում, այնպես են քարոզչության զոհ դարձել, որ իրենք էլ արդեն չգիտեն, թե ում հավատան, ում լսեն, որ ուղղությամբ գնան:  Որքան պետք  է կրթված լինես, որ չհավատաս այս կեղծ քարոզչությանը, իսկ մեզանում բոլորը չէ, որ կրթված են: Այս իմաստով՝ մենք անելիք ունենք՝ մեր իմացածը փոխանցելու, կիսելու, կրթելու։

Մենք տարեցտարի խնդրի առաջ ենք կանգնում, մարդիկ մոռանում են՝ ով են, որտեղից են եկել: Համացանցում այնքան է օտարամոլությունը տարածվել, որ որոշներն ամաչում են, որ հայ են, մարդիկ, երբ ֆիլմ են դիտում, իրենք էլ են ուզում, օրինակ, ամերիկացի դառնալ: Երբ հեռուստացույցը միացնում ենք, այնպիսի անբարո հաղորդումներ են, որ չես ուզում նայել, իսկ մեր պատանիները հենց դա են նայում: Մեր առջեւ խնդիր է դրված գոնե այս զարդով հիշեցնել Նժդեհի մասին, բացատրել, թե ով է նա»,- ասաց նա:

Զարդերի վաճառքը իրականացնում է դեռեւս միայն համացանցով,  հույս ունի, որ շուտով իր փոքրիկ անկյունը կստեղծի, դեռ չի շտապում: Հետաքրքրվեցինք՝  տեսակետ կա, թե երիտասարդները լքում են Հայաստանը եւ ապագա չեն տեսնում այստեղ, մասնավորապես՝ բիզնեսով զբաղվող անձինք, Դուք զգո՞ւմ եք, որ չկա պետական աջակցություն նորարար ձեռներեցներին՝ երկրում մնալու եւ ստեղծելու համար:

«Կա, իհարկե, այդպիսի մտայնություն, բայց ես չեմ լքելու իմ երկիրը, որովհետեւ գիտեմ, որ ոչ մի տեղ չեմ գտնի այն, ինչ կա իմ հայրենիքում: Ես այստեղ եմ ծնվել, այստեղ եմ ապրելու եւ պարտավոր եմ լավ գործ անել իմ երկրի ու հայրենակիցների համար: Եթե սիրում ես, կմնաս, հայրենիք ամեն տեղ չես գտնի»,- նշեց նա:

Մինչ այս՝ Անահիտը եռաչափ քանդակներ էր հավաքում, համագործակցում էր տարբեր ընկերությունների հետ, զուգահեռ մտածում իրենը ստեղծելու մասին: Մտածում էր՝ այն, ինչ անում է ուրիշների համար, ինչո՞ւ չանի իր համար:

«Ընտանիքիս անդամները, քույրս ասում էին՝ ինչո՞ւ քո զարդերը չես ստեղծում: Բիզնեսից հեռու էի, գնացի բիզնես դասերի ու սկսեցի: Ի սկզբանե ապրանքի վաճառքը միայն Հայաստանում էի պատկերացնում։ Որ նաեւ երկրից դուրս հանենք՝ բրենդի անունը փոխեցի:Պահանջարկը կա, բայց ես փորձում եմ նայեւ առաջարկով ստեղծել պահանջարկ: Ես աշխատում եմ որակի ու գաղափարի վրա»,- ընդգծեց զրուցակիցս։

Մանրամասն՝ տեսանյութում

Լիանա Սարգսյան