ԱՄՆ-ն արգելել է առևտուրը Դոնբասի և Լուգանսկի հետ

ԱՄՆ նախագահ Ջո Բայդենն արգելել է անհատների և ամերիկյան հաստատությունների ցանկացած առևտրային ու ֆինանսական կապ Դոնեցկի և Լուգանսկի Ժողովրդական Հանրապետությունների հետ, որոնց անկախությունը նախօրեին ճանաչել էր Ռուսաստանը։

Ըստ Սպիտակ տան՝ Բայդենը ստորագրել է «Որոշ անհատների ակտիվների սառեցում և որոշ բիզնեսների արգելք՝ ի պատասխան Ուկրաինայի ինքնիշխանությունն ու տարածքային ամբողջականությունը խաթարող Ռուսաստանի գործողությունների» հրամանը:

Դրա համաձայն՝ ամերիկյան ընկերությունները չեն կարողանա ներդրումներ կատարել Դոնբասի երկու հանրապետություններում և իրականացնել ցանկացած տնտեսական գործունեություն այս տարածաշրջանում: Այս տարածաշրջաններից ապրանքների ուղղակի կամ անուղղակի ներմուծումը կամ արտահանումը Միացյալ Նահանգներ արգելվում է:

Բացի դրանից՝ հրամանագիրը նախատեսում է պատժամիջոցների կիրառում նրանց նկատմամբ, ովքեր կորոշեն տնտեսական գործունեություն ծավալել այդ շրջաններում։