Թուրքիայում ձնահյուսի հետևանքով մահացել է երկու թուրք զինվոր

Դեկտեմբերի 28-ին Թուրքիայի հարավ-արևելքում հայտնաբերվել է ձնահյուսի տակ ընկած զինվորի դի, զոհերի թիվը հասել է 2-ի. հայտնում է Hurriyet-ը:

Ձնահյուսը տեղի է ունեցել կիրակի օրը, երբ զինվորները ձյուն մաքրելիս են եղել Հաքքարի նահանգի Շեմդինլի շրջանի ռազմակայանի մոտակայքում գտնվող ճանապարհին:

Տեղի վարչակազմը հայտնել է, որ մեկ զինվորի մարմին հայտնաբերվել է վաղ առավոտյան՝ որոնողափրկարարական աշխատանքների ժամանակ:

Պաշտպանության նախարարությունը կիրակի հայտնել է, որ ձնահյուսի արդյունքում երկու զինվոր հայտնվել է ձյան շերտի տակ: Զինծառայողներից մեկին հաջողվել է փրկել և տեղափոխել տեղական ինքնակառավարման հիվանդանոց: Չնայած բժիշկների բոլոր ջանքերին՝ զինվորը մահացել է: