«Հյուրիեթ»-ի անդրադարձը Աղթամար կղզու Սուրբ Խաչ եկեղեցուն

Թուրքական հեղինակավոր «Հյուրիեթ» պարբերականը Վանում զբոսաշրջությունը զարգացնելու նպատակով անդրադարձել է Վան նահանգի Աղթամար կղզու Սուրբ Խաչ եկեղեցու պատմությանը։ Այդ մասին հայտնում է Akunq.net-ը։

Աղբյուրի փոխանցմամբ՝ հրապարակման մեջ նախ արձանագրվում է, թե «հազարամյակներ շարունակ բազմաթիվ քաղաքակրթություններ հուշարձաններ են թողել Թուրքիայում», որոնց այս երկրում կարելի է հանդիպել ամենուրեք։ Պարբերականը, սակայն, չի հիշատակում Վանի և շրջակայքի պատմականորեն հայկական լինելու փաստը, այլ խեղաթյուրելով պատմությունը՝ նշում է, թե քանի որ տվյալ բնակավայրերում հայ բնակչության թիվը մեծ է եղել, այստեղ կառուցվել են նաև քրիստոնեական սրբավայրեր։

«Հյուրիեթ»-ի հրապարակման մեջ արձանագրվում է, որ սույն եկեղեցին կառուցվել է հայ միջնադարյան ճարտարապետության ոճով, ճարտարապետ Մանուելի կողմից, 915-921 թթ․։ Նաև նշվում է, որ երբ 1021 թ․ Վասպուրականի թագավորությունն անկում ապրեց, Աղթամարը 1113 թ․ վերածվեց վանքի, և քանի որ այս շրջանում հոծ թվով հայ բնակչություն կար, հետագայում եկեղեցին դարձավ Հայոց կաթողիկոսարան։ Սակայն միտումնավոր չի ընդգծվում Վասպուրականի՝ հայկական թագավորություն լինելու փաստը։

«Հյուրիեթ»-ն անդրադառնում է նաև «Ախթամարի» լեգենդին և վերջում ընթերցողներին հիշեցնում, որ թանգարանի վերածված՝ Աղթամար կղզու Սուրբ Խաչ եկեղեցի կարելի է այցելել ամռանը ժամը 9։00-19։00, իսկ ձմռանը՝ 8։00-17։00-ը։

https://www.hurriyet.com.tr/seyahat/akdamar-kilisesi-nerede-ve-nasil-gidilir-akdamar-kilisesi-tarihi-hikayesi-ve-ziyaret-saatleri-2020-41613185?fbclid=IwAR07LMIsQkuBSm6_ysLFVWn1IhlEC7c-K2fPDfgC0atcGoqSNmVMcyMgEPU

Թարգմանեց Մելինե Անումյանը

Akunq.net