ՏԵՍԱՆՅՈՒԹ․ Երևանի փողոցներում մարդկանց քանակն ու տեղաշարժը նկատելիորեն ավելացել են․ Հայկ Մհրյան

Արտակարգ դրության ռեժիմը խախտելու համար Ոստիկանությունը կազմել է 10 377 վարչական արձանագրություն՝ ըստ Yerkir.am-ի ասաց ՀՀ փոխոստիկանապետ Հայկ Մհրյանը։

«Վարույթներից 82-ը կազմվել է ֆինանսատնտեսական գործունեության սահմանափակման կանոնները խախտելու համար, 10 269-ը՝ ազատ տեղաշարժի կանոնները խախտելու համար, 26-ը՝ ինքնամեկուսացման կամ մեկուսացման կանոնները խախտելու համար։ 6 706 դեպքով կայացվել են վարչական տույժ նշանակելու որոշումներ, 35 դեպքով վարչական վարույթները կարճվել են, 3 636 դեպքերով վարույթները դեռ գտնվում են ընթացքի մեջ»,- մանրամասնեց նա։

Ոստիկանությունը հսկել է 1 606 հուղարկավորություն, ինչպես նաև ապահովել է արտերկրից ստացած 18 փակ դագաղներով հուղարկավորություններ իրականացումը՝ պարետի սահմանած կարգին համապատասխան։

Մհրյանը համաձայնեց՝ Երևանի փողոցներում մարդկանց քանակն ու տեղաշարժը նկատելիորեն ավելացել են:

«Մեր քաղաքացիների քանակն ավելացել է: Դա ոստիկանությունը կապում է նրա հետ, որ պարետի որոշմամբ որոշակի տնտեսական սահմանափակումներ հանվեցին, ու մարդիկ գնում են աշխատանքի, աշխատանքից՝ տուն»,- նշեց փոխոստիկանապետը:

Նրա խոսքով՝ ոստիկանության այս ուղղությամբ տարվող աշխատանքները նույնն են: Ոստիկանությունը փորձում է աչալուրջ իրականացնել իր հիմնական խնդիրները, դրան զուգահեռ նաև կորոնավիրուսով պայմանավորված վերահսկողությունն է իրականացնում:

Այսօրվա դրությամբ Հայաստանի Ոստիկանության հոսպիտալում կորոնավիրուսով վարակված 106 մարդ է բուժվում՝ տեղեկացրեց Մհրյանը:

Նա հիշեցրեց, որ մարտի 19-ից հոսպիտալը որպես ինֆեկցիոն հիվանդանոց է գործում: Ըստ Մհրյանի` նշված ժամանակահատվածում կորոնավիրուսի կասկածով 124 ոստիկան է ինքնամեկուսացվել, 30-ը՝ մեկուսացվել: Կորոնավիրուս է հաստատվել ոստիկանության 10 սպայի մոտ, նրանցից 5-ն առողջացել է:

ՀՀ փոխոստիկանապետը ներկայացրեց նաև, թե 2020-ի մարտի 16-ից ապրիլի 16-ը քանի ճանապարհատրանսպորտային պատահար է արձանագրվել։

«225 ՃՏՊ, որոնք ուղեկցվել են մարմնական վնասվածքներով։ Զոհվել է 17 մարդ, 339-ը ստացել է տարբեր աստիճանի մարմնական վնասվածքներ։ 2019-ի նույն ժամանակակահատվածում տեղի է ունեցել 342 ՃՏՊ, որի հետևանքով զոհվել է 19 մարդ, 501-ը ստացել են տարբեր աստիճանի մարմնական վնասվածքներ։ ՃՏՊ-ներից 93-ը տեղի է ունեցել Երևանում, 132-ը՝ մարզերում»,- նշեց Մհրյանը։

Նույն ժամանակահատվածում տեսանկարահանող և լուսանկարահանող սարքերով և արագաչափերով հայտնաբերվել է 36 685 իրավախախտում, որից 19 016-ը խաչմերուկների տարածքում կատարված խախտումներ են, իսկ 17 673-ը՝ թույլատրելի արագության գերազանցումներ։

Ճանապարհային ոստիկանության անձնակազմի կողմից կազմվել է 21 268 արձանագրություն և տարբեր իրավախախտումների համար վարելու իրավունքից զրկվել է 104 վարորդ։

Մանրամասն՝ տեսանյութում․