Ինչպե՞ս պետք է աշխատեն կազմակերպություններն Արցախում. ներկայացրել է տեղեկատվական շտաբը

Արցախի տեղեկատվական շտաբը ներկայացրել է կազմակերպություններում սանիտարահամաճարակային կանոնների պահպանման, դրանց խախտման դեպքում հնարավոր վտանգների եւ աշխատանքների կազմակերպման վերաբերյալ տեղեկատվություն:

Հաղորդագրության մեջ ասվում է.

«Առողջ եւ անվտանգ աշխատանքային պայմաններ ունենալու իրավունքը յուրաքանչյուր աշխատողի սահմանադրական իրավունքն է, որի ապահովման պարտականությունը կրում է գործատուն: Նոր տեսակի կորոնավիրուսային հիվանդության (COVID-19) (այսուհետ՝ վարակ) տարածումը կանխելու եւ աշխատողների համար անվտանգ եւ առողջության համար անվնաս պայմաններ ապահովելու նպատակով կազմակերպությունների աշխատողների համար աշխատանքի անվտանգ կազմակերպման նպատակով պետք է՝

• Ապահովել պայմաններ՝ ձեռքերի կանոնավոր եւ մանրակրկիտ լվացման (լվացարաններ), չորացման համար: Աշխատավայրում ապահովել ջրի եւ օճառի, ալկոհոլային հիմքով ձեռքերի ախտահանիչների, եռաշերտ դիմակների, ձեռնոցների առկայությունը:
• Ապահովել դիմակների կրումն այն աշխատակիցների կողմից, ովքեր անմիջական շփումներ ունեն հաճախորդների հետ:
• Ապահովել յուրաքանչյուր 10 աշխատողի հաշվարկով առնվազն մեկ ծորակի առկայություն:
• Ապահովել փակվող աղբամաններ` օգտագործված դիմակները նետելու համար:
• Յուրաքանչյուր աշխատակցի ջերմությունը չափել նվազագույնը օրական երկու անգամ (հեռավար կամ անհատական օգտագործման ջերմաչափներով, այդ թվում՝ աշխատակիցների անձնական ջերմաչափներով), որից մեկը աշխատակցի աշխատանքի ներկայանալու ժամանակ՝ կատարելով համապատասխան նշումներ գրանցամատյանում:
• Օրական առնվազն երկու անգամ սահմանված ժամերի ախտահանել տարածքը՝ դռների բռնակները, սեղանները, ձեռքով հաճախակի հպման մակերեսները (սարքերի մակերեսներ, լույսի անջատիչներ, սարքավորումների վրայի բռնակները, հեռակառավարման վահանակներ, ընդհանուր օգտագործման հեռախոսներ, համակարգիչներ, ստեղնաշարեր եւ մկնիկեր, բանկերում եւ այլ կազմակերպություններում՝ հաճախորդների կամ տարբեր անձանց կողմից օգտագործվող գրիչներ եւ այլն), սանհանգույցները, ձեռքերի հպման համար նախատեսված մակերեսները:
• Ախտահաման համար կիրառել քլորի հիմքով կամ 60-80% սպիրտպարունակող ախտահանիչ նյութեր՝ նյութին կից մեթոդական ուղեցույցին համապատասխան: 8. Ապահովել աշխատատեղերի միմյանցից նվազագույնը 2 մետր հեռավորությունը (համաձայն Առողջապահական համաշխարհային կազմակերպության ցուցումների):
• Անձնական (դրսի եւ տնային) եւ աշխատանքային հագուստի պահպանման համար ապահովել արտահագուստի (սանիտարական հագուստի) համար նախատեսված հանդերձապահարաններ,
• Հնարավորինս սահմանափակել ներգնա եւ բացառել արտագնա գործուղումները։
• Հարգելի համարել սուր շնչառական վարակներին բնորոշ ախտանշաններով (թեթեւ հազ, ջերմության բարձրացում) աշխատակիցների բացակայությունն աշխատանքից, բացառել վերջիններիս մուտքը աշխատավայր, իսկ եթե ախտանիշները ի հայտ են գալիս աշխատանքի ընթացքում՝ անհապաղ հայտնել ԱՀ առողջապահության նախարարություն եւ ապահովել աշխատակցի մեկուսացումը։
• Աշխատավայրում վիրուսով ախտահարված աշխատակից ունենալու մասին տեղեկատվություն ստանալու դեպքում անհապաղ առանձնացնել այն անձանց շրջանակը, ովքեր շփում են ունեցել վարակակիր անձի հետ եւ հայտնել ԱՀ առողջապահության նախարարությանը։
• Աշխատավայրում վարակի կասկածով աշխատակից ունենալու դեպքում զանգահարել Առողջապահության նախարարության թեժ գիծ, հնարավորության դեպքում անմիջապես ախտահանել այն տարածքը, որտեղ աշխատել է աշխատակիցը, ինչպես նաեւ ցանկացած այլ տարածք եւ մակերես, որը կարող էր հասանելի լինել տվյալ աշխատակցին։
• Անհրաժեշտության դեպքում ապահովել մեկուսացված անձանց հեռավար աշխատանքի հնարավորությունը:

Աշխատանքի կազմակերպումը

Ապահովել միաժամանակ աշխատատեղում գտնվող մարդկանց քանակը նվազեցնելուն ուղղված ճկուն աշխատանքային պայմաններ բազմազավակ մայրերի, հղի կանանց, 60 եւ ավելի տարիք եւ/կամ շաքարային դիաբետ, սրտանոթային, շնչառական հիվանդություններ կամ այլ խրոնիկ հիվանդություններ ունեցող անձանց, հիվանդներին եւ երեխաներին խնամող աշխատակիցների համար։

• Աշխատավայրում հիվանդության կասկածի պարագայում վարակին ոչ բնորոշ ախտանշանների դեպքում հրահանգել աշխատակցին անհապաղ անցնել տնից աշխատանքի ռեժիմի, իսկ եթե դա հնարավոր չէ, ապա պարզապես հրահանգել աշխատակցին լքել աշխատանքի վայրը:
• Ներդնել անհրաժեշտ մեխանիզմներ աշխատանքը տնից կազմակերպելու համար՝ ապահովելով ԱՀ աշխատանքային օրենսդրությամբ սահմանված կարգով աշխատանքի դիմաց վարձատրությունը:
• Իրազեկել աշխատակիցներին անվտանգ վարվելաձեւի վերաբերյալ, մասնավորապես.
• խուսափել այլ անձանց հետ սերտ շփումներից՝ ձեռքով բարեւելուց, համբուրելուց, գրկախառնվելուց,
• փռշտալիս կամ հազալիս փակել բերանն ու քիթն անձեռոցիկով կամ արմունկով (ոչ ձեռքով),
• օգտագործած անձեռոցիկն անմիջապես նետել փակ աղբարկղը,
• հաճախակի լվալ ձեռքերը օճառով եւ ջրով՝ առնվազն 20 վայրկյան, անհնարինության դեպքում ձեռքերը մաքրել ալկոհոլային հիմքով ախտահանիչներով,
• հաճախորդների հետ անմիջական շփումներ ունենալու պարագայում կրել դիմակներ եւ ձեռնոցներ, ցանկալի է նաեւ արտահագուստ (սանիտարական հագուստ)
• խուսափել աչքերին, քթին, բերանին դիպչելուց,
• խուսափել շնչառական վարակի ախտանիշ ունեցող անձանց հետ սերտ շփումից, իսկ անխուսափելի շփման դեպքում օգտագործել դիմակ` պահպանելով առնվազն 2 մետր հեռավորություն,
• Աշխատանքային օրվա մեկնարկին եւ ավարտին ախտահանել սեղանը, համակարգիչը, հաճախակի օգտագործվող այլ պարագաները։ Աշխատակիցներին պարզաբանել օգտագործման տարածքն ախտահանելու համար անհատական պատասխանատվություն կրելու մասին:
• Աշխատակիցների իրազեկման տեղեկատվական թերթիկ

Ի՞նչ է վիրուսը

Կորոնավիրուսները կարող են առաջացնել ինչպես թեթեւ (սուր շնչառական վարակ, հարբուխ), այնպես էլ ծանր ընթացքով հիվանդություններ, օրինակ՝ Ծանր սուր շնչառական համախտանիշ (SARS) եւ Մերձավոր Արեւելքի շնչառական համախտանիշ (MERS): Վիրուսը կոչվում է «Նոր», քանի որ այն նոր է հայտնաբերվել: Հավանական է, որ վիրուսն ունի կենդանական ծագում, եւ այժմ կան ապացույցներ, որ այն կարող է փոխանցվել մարդուց մարդ:

Որո՞նք են ախտանշանները

Ախտանշանները ներառում են (բայց չեն սահմանափակվում) բարձր ջերմություն, հազ, կոկորդի ցավ, թուլություն եւ դժվարացած շնչառություն:

Ինչպե՞ս է տարածվում վիրուսը

• Վիրուսը տարածվում է մարդուց մարդ.
• Կորոնավիրուսային հիվանդությամբ հիվանդի հետ սերտ շփման արդյունքում:
• Կորոնավիրուսային հիվանդությամբ հաստատված հիվանդի հազալու կամ փռշտալու հետեւանքով առաջացած կաթիլի հետ շփման ուղիով:
• Կորոնավիրուսային հիվանդությամբ հիվանդի հազալու կամ փռշտալու հետեւանքով առաջացած կաթիլներով աղտոտված մակերեսներին կամ առարկաներին (օրինակ՝ դռան բռնակներ կամ սեղաններ) դիպչելու, այնուհետեւ՝ բերանին կամ դեմքին դիպչելու հետեւանքով:

Որքա՞ն ժամանակ անձը կարող է լինել վարակիչ այլոց համար

Առողջապահության նախարարությունը ներկայումս առաջարկում է 14 օրվա մեկուսացում՝ Կորոնավիրուսային հիվանդությամբ անապահով երկրներից վերադարձած ճանախարհորդների եւ Կորոնավիրուսային հիվանդությամբ հաստատված դեպքի հետ սերտ շփում ունեցած անձանց համար:

Ովքե՞ր են գտնվում ծանր հիվանդության զարգացման բարձր ռիսկային խմբում

Վարակված անձանց մի մասը կարող են չունենալ որեւէ ախտանշան, մի մասի մոտ այն կարող է ընթանալ շատ մեղմ եւ նրանք կարող են հեշտությամբ ապաքինվել: Մյուս մասի մոտ կարող է ընթանալ շատ ծանր եւ կայծակնային: Հիվանդության ծանր զարգացման ռիսկի խմբում են գտնվում.

• Թույլ իմունային համակարգ ունեցող անձինք (օր.՝ քաղցկեղ)
• Մեծահասակներ՝ 70 տարեկան եւ բարձր
• Քրոնիկ հիվանդություններով անձինք
• Մանկահասակ երեխաներ եւ նորածիններ