ՏԵՍԱՆՅՈՒԹ․ Արտակարգ դրություն․ ինչպե՞ս են վերհսկելու՝ արդարադատության փոխնախարարից

Արտակարգ դրությունը շարունակվելու է մինչև ապրիլի 14-ի ժամը 17։00-ն․ ըստ Yerkir.am-ի՝ ՀՀ արդարադատության փոխնախարար Վահե Դանիելյանը մանրամասնել է՝ ով և ինչպես է վերահսկելու, որ արտակարգ դրությունը պահպանվի։

Նա տեղեկացրեց, որ լիազոր մարմինը Ոստիկանությունն է․ երբ կորոնավիրուսով վարակվածների մասին պաշտոնական տեղեկատվությունից տարբեր տվյալ հրապարակվի կամ այնպիսի տեղեկատվություն, որը կորոնավիրուսի մասին չէ, բայց խուճապ է առաջացնում, Ոստիկանությունը կարող է հրապարակումը վերացնելու պահանջ ներկայացնել։

Լրագրողներին հետաքրքրեց՝ ի՞նչ է պետությունն անում, որ վարակակիրներին պաշտպանի, քանի որ Էջմիածնում վարակված կնոջ հասցեին վիրավորական բնորոշումները բազմաթիվ էին։

«Արտակարգ դրություն հայտարարելու որոշմամբ՝ ԶԼՄ-ների մասով ասվում է, որ վարակակիրների առողջական վիճակի վերաբերյալ տեղեկատվություն չտրամադրի։ Եթե ասի՝ անձը ինչ առողջական վիճակում է գտնվում, արտակարգ իրավիճակի խախտում է և Ոստիկանույունը կարող է դիմել այդ լրատվամիջոցներին՝ խախտումները վերացնելու նպատակով»,-պատասխանեց Վահե Դանիելյանը։

Նա մանրամասնեց, որ կորոնավիրուսով վարակված անձանց, նրանց հետ շփում ունեցածների, մեկուսացած և ինքնամեկուսացած անձանց  մասին տեղեկատվություն պետք է հրապարակել միայն պաշտոնական աղբյուրից, այլ տեղեկատվություն չի կարող հրապարկվել․ պաշտոնական աղբյուրն այս դեպքում պարետատունն է, իսկ պարետը՝ փոխվարչապետ Տիգրան Ավինյանը։

Այս սահմանափակումը, նրա խոսքով, վերաբերում է նաև սոցցանցերում հրապարակումներին։

Վահե Դանիելյանն անդրադարձավ նաև հանրային միջոցառումների սահմանափակումներին․ պարետի ցուցմամբ՝ առանձին տարածքներում կարող է հսկողություն իրականացվել և սահմանվել, որ 20 հոգուց ավելի չհավաքվեն։

«Իհարկե, Ոստիկանությունն է ապահովում այս ռեժիմը, եթե իրավիճակ լինի, որ չպահպանեն այս սահմանափակումը, վարչական պատասխանատվության կենթարկվեն այդ անձինք։ Երբ սահմանվի այդ հանրային միջոցառումների արգելքը, նաև կտրամադրվի մեթոդոլոգիա՝ ինչպես իրականացնել, որ խախտում տեղի չունենա»,-ասաց նա։

Կալանավորներին ազատ արձակելու հարց չի քննարկվել, սահմանվել է միայն հանձնուքների և տեսակցումների սահմանափակում, որն ապահովում է այս անձանց անվտանգությունը։

Կարանտինային ռեժիմը խախտելու համար պատասխանատվություն նախատեսող նախագծերն արդեն պատրաստ են և շուտով կդրվեն շրջանառության մեջ․ դրանք և՛ վարչական, և՛ քրեական պատասխանատվություն են նախատեսում՝ կախված իրավախախտման վտանգավորությունից։

Ընդհանուր առմամբ՝ մարդկանց իրավունքներն ու ազատությունները սահմանափակվել են 2 խմբով՝ առաջին խումբը գործում է կառավարության որոշման հիման վրա, երկրորդը՝ կգործի, եթե լինի պարետի կոնկրետ ցուցում։

Մանրամասն՝ տեսանյութում․