ՏԵՍԱՆՅՈՒԹ. Տրամաբանությունն այնպիսին է, որ պետք է արտակարգ դրություն հայտարարել. Նիկոլ Փաշինյան

Ավելի քան 300 ՀՀ քաղաքացիներ մեկուսացված են, ևս 300-ի համար տարածքներ ենք պատրաստել. այս մասին ֆեյսբուքյան իր ուղիղ եթերում նշեց ՀՀ վարչապետ Նիկոլ Փաշինյանը՝ կառավարությունում կայացած խորհրդակցությունից հետո. հայտնում է Yerkir.am-ը:

«Որոշել ենք, որ մեկուսացման քաղաքականությունը պետք է շարունակել: Մի բան ակնհայտ է, որ մենք կհաղթահարենք ոչ միայն կորոնավիրուսը, այլև ակնկալվող տնտեսական դժվարությունները: Այսօրվանից պետք է տրամադրվենք, որ թե՛ առողջապահական համակարգի, թե՛ օրենսդրության, թե՛ քաղաքացիական համերաշխության, թե՛ ազգային միասնության, թե՛ տնտեսական առումով պետք է խնդիր դնենք, որ ՀՀ-ն, բոլորս պետք է այս իրավիճակից դուրս գանք ուժեղացած, ավելի պինդ ամուր դիրքերից հանդես գանք», - հայտարարեց Փաշինյանը:

Անդրադառնալով տնտեսության վրա հնարավոր ազդեցություններն՝ վարչապետը նշեց, այդ իրավիճակը կքննարկվի և պարզ կդառնա, թե ինչ միջոցներ կկիրառվեն: «Ունեմ պատկերացումներ, թե տնտեսական  դժվարություններն ինչպես պետք է հաղթահարենք, եւ կհաղթահարենք, կասկած չունենաք»,- ասաց Փաշինյանը:

Վարչապետը հայտնեց, որ ժամը 15.00-ին տեղի կունենա ՀՀ կառավարության արտահերթ նիստ: Այն կլինի ուղիղ հեռարձակմամբ. «Արտակարգ դրություն հայտարարելու հետ կապված քննարկման ընդհանուր տրամաբանությունն այսպիսին էր, որ մենք այդ որոշումը պետք է կայացնենք: Շատ մանրամասներ կառավարության նիստում կհնչեն, որից հետո իրավունքի ուժով կհայտարարվի ԱԺ նիստ, այնտեղ էլ պատգամավորների հարցերին կպատասխանենք: Այս քննարկումները կարևոր են, որ գնահատենք քայլերի համարժեքությունը»: