Լոռու մարզում Գլորիա կարի ֆաբրիկայի աշխատողների «ՊԱԶ» ավտոբուսի և «Opel Astra»-ի բախումից տուժել է 24 քաղաքացի

Հայաստանի ԱԻՆ-ում այսօր՝ մարտի 17-ին, ժամը 08։43-ին Ճգնաժամային կառավարման ազգային կենտրոն ահազանգ է ստացվել, որ Վանաձոր-Սպիտակ ավտոճանապարհին տեղի է ունեցել ավտովթար՝ կան տուժածներ. հայտնում են ԱԻՆ-ից:

Պարզվել է՝ Սպիտակ-Վանաձոր ավտոճանապարհի 10-րդ կմ-ին բախվել են «Գլորիա» կարի ֆաբրիկայի աշխատակիցներին տեղափոխող «ՊԱԶ» մակնիշի ավտոբուսը և «Opel Astra» (վարորդ՝ Արեն Դ., ծնված 1979 թ.) մակնիշի ավտոմեքենան, ինչի հետևանքով ավտոբուսը կողաշրջվել է, կան տուժածներ։

Մինչ փրկարարների կանչի վայր հասնելը՝ տուժածներից մեկը տեղի ուժերով դուրս է բերվել ավտոբուսի տակից. տուժածին մոտեցրել են շտապօգնության ավտոմեքենային, վերջինս հոսպիատալացվել է Սպիտակի ԲԿ:

Վանաձորի ԲԿ է դիմել Զարուհի Հ.-ն (ծնվ.1964թ.), ում առողջական վիճակը գնահատվել է միջին ծանրության։ Սպիտակի ԲԿ են տեղափոխվել 23 տուժած (մեկը շտապօգնության ավտոմեքենայով), որոնցից Ջուլինա Հ.-ի (ծնված 1962 թ.), Շուշանիկ Դ.-ի (ծնված 1966 թ.), Վերժինե Զ.-ի (ծնված 1958 թ.), Քրիստինե Ե.-ի (ծնված 1971 թ.), Ամալյա Թ.-ի (ծնված 1965 թ.), Արմենուհի Հ.-ի (ծնված 1974 թ.) և Անահիտ Ա.-ի (ծնված 1970 թ.) առողջական վիճակները գնահատվել են միջին ծանրության, իսկ մյուս 16-ը՝ դուրս գրվել:

Հիշեցնենք՝ «Գլորիա» կարի ֆաբրիկան հենց այն նույն ընկերությունն էր, որտեղից օրեր առաջ 6 աշխատակից կորոնավիրուսի կասկածով մեկուսացվել էին: Նրանց թեստի արդյունքները բացասական էին: