Որտեղ՝ հայ, այնտեղ՝ եկեղեցի. հայկական եկեղեցիներ՝ անհավանական վայրերում

Հայերի բնակության վայրերի աշխարհագրական բազմազանությունը մեր ժողովրդի երկարամյա պատմության ու ողբերգությունների հետևանք է: Ապրելով այլ երկրներում՝ հայերը մշտապես բախվել են ուծացման խնդրին, և ինքնության պահպանմանը նպաստել են մայրենի լեզուն ու կրոնը: Yerkir.am-ը tabloid.am-ի հետ ներկայացնում է մի քանի էկզոտիկ երկրներում կառուցված հայկական եկեղեցիներ:

Բանգլադեշ. Սուրբ Հարություն եկեղեցի

Կառուցվել է 1781 թվականին, գտնվում է մայրաքաղաք Դաքքայի հին մասի Արմանիտոլա թաղամասում: Եկեղեցին քաղաքի ամենահին կառույցներից է: Այն օծել է եպիսկոպոս Եփրեմը, որն ավելի ուշ՝ 1809-ին, դարձել է Ամենայն Հայոց կաթողիկոս՝ Եփրեմ Ա Ձորագեղցի: Այսօր եկեղեցին փակ է, այնտեղ մտնելու համար հարկավոր է իշխանությունների հատուկ թույլտվությունը:

Սինգապուր. Սուրբ Գրիգոր Լուսավորիչ եկեղեցի

Եկեղեցին գտնվում է Հիլ Սթրիթ փողոցում, Սինգապուրի հնագույն քրիստոնեական տաճարն է: Այն ճանաչվել է որպես ազգային հուշարձան և պահպանվում է պետության կողմից:

1833-ին եկեղեցու կառուցման համար Սինգապուրի իշխանությունները հայկական համայնքին հողատարածք էին տրամադրել: Ի դեպ, այդ ժամանակ հայկական համայնք ասվածն ընդամենը 44 մարդ էր: Եկեղեցու շինարարությունն ավարտվել է 1835 թվականին, օծվել է 1836-ի մարտի 26-ին:

Մյանմա (Բիրմա). Սուրբ Հովհաննես Մկրտիչ եկեղեցի

Կառուցվել է  1862 թվականին Բիրմայի թագավորի կողմից Յանգոն քաղաքում հատկացված հողատարածքում: 1871-1872 թթ. մարդահամարի տվյալներով՝ Բիրմայում բնակվում էր 466 հայ: Սուրբ Հովհաննես Մկրտիչ եկեղեցին գտնվում է Աունգ Կյավ 66 հասցեում:

Արաբական Միացյալ Էմիրություններ. Սուրբ Գրիգոր Լուսավորիչ եկեղեցի

Եկեղեցին գտնվում է Շարժա քաղաքի Յարմուկ շրջանում՝  երկրի աշխատանքի և սոցիալական գործերի նախարարությունից 300 մ հեռու: 1979 թվականին երկիր է այցելում Մեծ Տանն Կիլիկիո կաթողիկոսության երիտասարդ քահանա Օշական Չալոյանը և 1980-ին նշանակվում կաթողիկոսի ներկայացուցիչ Քուվեյթում ու Պարսից ծոցի երկրներում: Համարվում է, որ եկեղեցին էլ կառուցվել է 1980-ին: Այսօր ԱՄԷ-ում բնակվում է մոտ 5000 հայ:

Վենեսուելա. Սուրբ Գրիգոր Լուսավորիչ եկեղեցի

Կառուցվել է մայրաքաղաք Կարակասում 1987-ին: Եկեղեցուն կից գործում են կիրակնօրյա դպրոց և երգչախումբ: 2001-ին եկեղեցու կողքին կանգնեցվել է Հայոց ցեղասպանության զոհերի հիշատակին նվիրված հուշարձան (Վենեսուելայի խորհրդարանը 2005-ի հուլիսի 14-ին ճանաչել է Հայոց ցեղասպանությունը): Վենեսուելայի հայկական համայնքը ձևավորվել է 20-րդ դարի սկզբին Մերձավոր Արևելքից՝ հիմնականում Սիրիայից ժամանածներից: Ներկայումս Վենեսուելայում բնակվում է մոտ 4000 հայ, որոնցից 1000-ը՝ Կարակասում:

Սվազիլենդ. Սուրբ Հարություն եկեղեցի

Գտնվում է աֆրիկյան Սվազիլենդի Մբաբանե մայրաքաղաքում: Շինարարությունը նախաձեռնել է Գրիգոր Դերբելյանը՝ ցեղասպանությունից մազապուրծ հայերի ժառանգ: Ցեղասպանության ժամանակ նրա մայրը՝ 20 օրական երեխան գրկին, ոտքով  հասել է Կահիրե՝ ամուսնու մոտ, սակայն մի քանի ամիս անց՝ մահացել: Եկեղեցին կառուցվել է 1989 թվականին, ունի երկու գմբեթ, մեկը զանգակատուն է: Եկեղեցու հետին պատը հենված է հսկայական քարի, որը խորանի հիմք է ծառայում՝ Գեղարդի եկեղեցու նման: