ՏԵՍԱՆՅՈՒԹ․ Մտավորականները դասախոսել են ՊԲ զորամասերում՝ ՊՆ կից հասարակական խորհրդի նախաձեռնությամբ

Ապրիլյան քառօրյայում զոհված փոխգնդապետ Առաքելյանի հուշատախտակի առջևով զինվորական շարասյունով անցնելիս, հրամանատարը գոչում է՝ «Հերոսին», զինվորները պատասխանում են՝ «փա՛ռք, փա՛ռք, փա՛ռք»․ ըստ Yerkir.am-ի՝ սա դրվագներից մեկն է, որ տպավորել է առաջնագիծ այցելած մտավորականներին։

«Շատ ցնցող տպավորություն թողեց ինձ վրա․ գիտեք ինչ հարգանքի նշան է զոհված հրամանատարի հիշատակի հանդեպ»,-ասաց ՀՀ ԳԱԱ պատմության ինստիտուտի տնօրեն Աշոտ Մելքոնյանը։

Մոտ 3 տասնյակ մտավորականներ՝ պատմաբաններ, բանասերներ, հասարակագետներ և այլն, այցելել են առաջնագծի զորամասեր և դասախոսություններ կարդացել՝ ՀՀ պաշտպանության նախարարին կից հասարակական խորհրդի նախաձեռնությամբ։

«Այս ծրագիրը ազգային ինքնության, ազգային գիտակցության խորացման, հայրենասիրական տրամադրությունների բարձրացման միտում ունի և այս հարցում մենք օժանդակություն ենք բերում բանակին»,-ասաց ՀՀ պաշտպանության նախարարին կից հասարակական խորհրդի նախագահ Գեղամ Հարությունյանը։

Արդեն 9-րդ տարին է, որ խորհուրդը գիտնականների, պրոֆեսորների, դասախոսների այցեր է կազմակերպում՝ տարին մի քանի անգամ։

Մտավորականներն ասում են՝ ոչ միայն զինվորների արձագանքից զգում են, որ այցերի անհրաժեշտությունը կա, այլև հենց իրենք այդ այցերի կարիքն ունեն։ Նրանք ևս բանակից սովորում են և ստանում այն առավելությունը, որ, ի տարբերություն ուրիշների, իրենք ներսից են ճանաչում բանակը և լսարան մտնելիս ու զինվորների հետ շփվելիս՝ լիցքավորվում են, հասկանում, որ մեր պետականության հիմքերն ամուր են։  

Աննա Բալյան

Առավել մանրամասն՝ տեսանյութում․