ՏԵՍԱՆՅՈՒԹ. 3 ժամ բանակցություն հանուն ոչնչի՞. ԱԳՆ-ն հայտարարություն է տարածել Մնացականյան Մամեդյարով հանդիպումից

ՀՀ ԱԳՆ-ն հայտարարություն է տարածել երեկ Սլովակիայի մայրաքաղաք Բրատիսլավայում տեղի ունեցած Մնացականյան-Մամեդյարով հանդիպման վերաբերյալ: Թե կոնկրետ ինչ է քննարկվել հանդիպման ընթացքում՝ ԱԳՆ-ն չի մանրամասնում: 3 ժամից ավել տևած հանդիպումից հետո նմանատիպ հայտարությունը կասկածելի է, քանզի այնտեղ խոսվում է արդեն երկար ժամանակ նույն ձևակերպումների, հայտարարությունների մասին: Այսպիսով թե կոնկրետ որն է եղել բանակցությունների առարկան, կամ արդյոք Ավստրիայում, Սլովակիայում, Սլովենիայում Ադրբեջանի դեսպանատան տարածած հայտարարությունը (ավելի շատ նման էր վերջնագիր Հայաստանին և Արցախին) եղել է սեղանին, մնում է հարցական:

Հայտարարության մեջ մասնավորապես նշված էր. «Բրատիսլավայում ԵԱՀԿ 26-րդ նախարարական խորհրդաժողովի աշխատանքներին մասնակցելու նպատակով Սլովակիա կատարած աշխատանքային այցի շրջանակներում ՀՀ ԱԳ նախարար Զոհրաբ Մնացականյանը դեկտեմբերի 4-ին հանդիպեց ԵԱՀԿ Մինսկի խմբի համանախագահներ Իգոր Պոպովի (Ռուսաստան), Ստեֆան Վիսկոնտիի (Ֆրանսիա), Էնդրյու Շոֆերի (ԱՄՆ), ինչպես նաև ԵԱՀԿ գործող նախագահի անձնական ներկայացուցիչ Անջեյ Կասպրչիկի հետ:

Լեռնային Ղարաբաղի հիմնախնդրի խաղաղ կարգավորման գործընթացի շուրջ վերջին զարգացումների համատեքստում առանձնահատուկ ընդգծեց խաղաղությանը նպաստող միջավայրի ձևավորման ուղղությամբ քայլերի ձեռնարկումը, այդ թվում նախորդ հանդիպումների ժամանակ ձեռքբերված պայմանավորվածություններին հավատարիմ մնալու միջոցով:

Ժողովուրդներին խաղաղության նախապատրաստելու պայմանավորվածության առումով դրական գնահատվեց ԵԱՀԿ գործող նախագահի անձնական ներկայացուցչի գրասենյակի համակարգմամբ լրագրողական փոխանակման ծրագրի իրականացումը, որին մասնակցեցին լրագրողներ Հայաստանից, Արցախից և Ադրբեջանից»։