Գիշերը չե՞ս կարող քնել

Անքնությունը կամ բժշկական լեզվով ՝ ինսոմնիան, ամենատարածված հիվանդություններից է`հայտնում է Yerkir.am-ը։ Աշխարհում տղամարդկանց 30%-ը , կանանց 37%-ը և երեխաների 25%-ը տառապում են այս հիվանդությամբ։ Չնայած տարածվածության, հիվանդներից քչերն են գիտակցում հիվանդության հնարավոր վտանգավոր բարդությունները և լրջորեն զբաղվում բուժմամբ։

Անքնության առաջացման հիմնական պատճառը սթրեսն է։ Սթրեսի առաջացմանը նպաստում են միջանձնային չավարտված կոնֆլիկտները, մարդու ֆիզիկական և մտավոր ունակություններին անհամապատասխան աշխատանքը, գերծանրաբեռնվածությունը, զանազան հոգեբանական բարդույթները և բազմաթիվ այլ սոցիալական գործոններ։

Ինչո՞վ է վտանգավոր անքնությունը։

Քունը օրգանիզմի նորմալ գործունեության պարտադիր պայման է։ Օրական 6-10 ժամ առողջ քնի ընթացքում օրգանիզմը վերականգնում է ուժերը , ուղեղը վերլուծում է օրվա իրադարձությունները և ձևավորում է մարդու վարքագծային առանձնահատկությունները։ Անքնության ժամանակ խախտվում են վերը նշված գործընթացները ՝ հետզհետե խորացնելով հիվանդի վիճակը։ Զարգանում է քրոնիկական անքնություն և 1,5-2 տարում կարող են զարգանալ շնչառության, սրտի ռիթմի խանգարումներ, ջղակծկումներ վերջույթներում, քրոնիկական հոգնածություն և ուշադրության կորուստ, հոգեհուզական խանգարումներ՝ ընդհուպ մինչև ծանր հոգեկան հիվանդություններ, որոնք անկասկած բերում են աշխատունակության խիստ նվազման և կորստի։

Ինչպե՞ս պայքարել անքնության դեմ։

Անքնությունից խուսափելու համար անհրաժեշտ է՝

• Պահպանել սնման ռեժիմը, բացառելով շատակերությունը և քնից առնվազն 3 ժամ առաջ սնունդ ընդունելը։
• Քնից առաջ չընդունել կոֆեին և ալկոհոլ պարունակող խմիչքներ։
• Զբոսնել երեկոյան։
• Սահմանափակել համակարգչից օգտվելը։
• Կարգավորել աշխատանքի ռեժիմը, փոխել աշխատանքի բնույթը, տեղափոխվել առավել համապատասխան աշխատանքի։

Տնային պայմաններում կարելի է

• Օգտագործել վալերիանայի թուրմ՝ օրը 3 անգամ, 20-25 կաթիլից։
• Օգտագործել քնից առաջ սոխ։
• Բարձի մեջ դնել դափնու չորացրած տերևներ։
• Կատարել ամենօրյա ֆիզիկական մարզանք։

Թվարկված մեթոդների անարդյունավետության պարագայում պետք է դիմել համապատասխան բժիշկ-մասնագետի, քանի որ անքնությունը կարող է լինել նաև բազմաթիվ ծանր հոգեկան և սոմատիկ հիվանդությունների ախտանիշ։