ՏԵՍԱՆՅՈՒԹ․ Գիշերը չեմ կարողացել հանգիստ քնել կադրերից՝ ինչպես են վազում մեր զինվորականների հետևից․ Արմեն Գևորգյան

Այն կադրերը, որ ես տեսել եմ՝ ինչպես են վազում մեր զինվորականների հետևից, ես գիշերը չեմ կարողացել հանգիստ քնել, իսկ մեր ՀՔԾ-ն զբաղված է մահացած մարդկանց գույքերը ինձ վերագրելով՝ ըստ Yerkir.am-ի ասաց «Հայաստան» դաշինքի նախընտրական շտաբի պետ Արմեն Գևորգյանը ՀՔԾ շենքի դիմաց լրագրողների հետ զրույցում։

Սյունիքում կատարվողի մասին Արմեն Գևորգյանն ասաց՝ իր անձնական մոտեցումն այն է, ինչ նաև նոյեմբերի 9-ից հետո է ասել․ այն փաստաթղթերը, որոնք ստորագրվել են և պատրաստվում են ստորագրման, լեգիտիմ չեն, մենք չենք կարող պետական սահմանները որոշել ինչ-որ հայտարարություններով, պիտի լինեն միջպետական պայմանգրեր։

«Եթե այնտեղ կան նախապայմաններ այսօր քննարկվելիք, պիտի հասկանանք՝ ինչի մասին է խոսքը, մենք տեսել ենք փաստաթղթի մի հատվածը, որն արդեն իսկ անհանգստացնող է։ Պատկերացնում եք, մեր պետական իշխանությունը կարևոր փաստաթուղթ է քննարկում թշնամու հետ, մենք չգիտենք՝ ինչի մասին է խոսքը։ Նիկոլ Փաշինյանը և պետական շահերը անհամատեղելի հասկացություններ են»,-ասաց Արմեն Գևորգյանը։

Հիշեցնենք, որ Արմեն Գևորգյանին կանչել են ՀՔԾ՝ իր հարազատների գույքի վրա կալանք դնելու հետ կապված քրեական գործով։