Բիոէներգետիկ ցուցահանդես Ստեփանակերտում. Սուսաննա Հարությունյանի «Եռակցումը»` արվեստասերի դատին

Ստեփանակերտի Վահրամ Փափազյանի անվան պետական դրամատիկական թատրոնի շենքում բացվել է Սուսաննա Հարությունյանի «Եռակցում» խորագրով նկարչական ցուցահանդեսը:

«Արցախպրես»-ի թղթակցի հետ զրույցում Սուսաննա Հարությունյանն ասել է, որ զբաղվում է բիոէներգետիկայով, իսկ նկարել  սկսել է 4 տարի առաջ:

«Այսօր իմ 5-րդ անհատական ցուցահանդեսն է, ներկայացնում եմ մոտ 60 նկար: Խորագիրը կրում է «Եռակցում» անվանումը: Խոսքը  հայ մտքի, հոգու և սրտի եռակցման մասին է, այդ թվում   նաև   Արցախի,  Հայաստանի և Սփյուռքի  միասնականության:Ես պատկերում եմ հիմնականում զգայական իրողություններն ու մարդկանց ապրումները: Ցանկանում եմ, որ իմ գույները պայծառություն,  սեր ու համերաշխություն բերեն Հայաստան աշխարհին»,-ասել է նա:

Ցուցահանդեսին ներկա Արցախի նկարիչների միության նախագահ Հովիկ Գասպարյանը ողջունել է Սուսաննա Հարությունյանի   արվեստը և նշել, որ նրա պայծառ ու գունեղ նկարների միջոցով կարճ ժամանակահատվածում կարողացել է ճանաչել  նրան:

Գասպարյանի խոսքով՝ Սուսաննա Հարությունյանը, կայացած նկարիչների նման, ունի ազատություն դեպի արվեստը: