Տարածաշրջանի զարգացումները Հայաստանին չեն հետաքրքրում, բայց դրանք կարող են խնդիրների կույտի վերածվել. Ոսկանյան

Մեր գործընկեր ու դաշնակից Ռուսաստանն ակտիվորեն ներգրավված է երկկողմ զանազան բանակցային գործընթացներում.  օրեր առաջ տեղի են ունեցել ՌԴ-ԱՄՆ ձևաչափով հանդւպումները, այս պահին էլ ընթանում է հանդիպում չինական կողմի հետ, և այդ բոլոր հանդիպումներին առանցքային կետերից մեկը, եթե ոչ առանցքայինը, Իրանի խնդիրն է. լրագրողների հետ այսօրվա հանդիպման ժամանակ ասաց իրանագետ Վարդան Ոսկանյանը:

Ըստ նրա` Ճապոնիայի ու Իրանի միջև նույնպես որոշակի բանակցային գործընթաց կա. ճապոնական կողմը նույնիսկ հայտարարում է, որ պատրաստ է միջնորդել ԱՄՆ-Իրան բանակցությունների անցկացման համար: Նաև, ըստ տարածված տեղեկատվության, Պարսից ծոցի արաբական երկրներից մեկում որոշակի շփումներ են ընթացել Միացյալ Նահանգների ու Իրանի միջև, Իրաքի ղեկավարությունն է պատրաստակամություն հայտնել մասնակցել միջնորդական առաքելությանը:

Իրանագետն ուշադրություն հրավիրեցայն հանգամանքին, որ այդ խնդիրներն ընդհանրապես արձագանք չեն գտնում, կամ էլ` արձագանքը չափազանց փոքր ու, ըստ էության, ծավալների չհամապատասխանող չափերով: «Բնական է,հայ հասարակությունն ու, ընդհանրապես, մեր երկիրը զբաղված են ներքաղաքական, շատ դեպքերում` նույնիսկ կենցաղային զանազան խնդիրներով, ինչի հետևանքով մեզ համար նշանակություն ունեցող բազմաթիվ գործընթացների ուղղակի անհաղորդ ենք մնում կամ հաղորդ ենք մնում որոշում ընդունողների վրա ազդեցություն չունեցող փորձագետների մակարդակով»,- հավելեց նա:

Yerkir.am-ի հարցին, թե այդ խնդիրներին հավուր պատշաճի ուշադրություն դարձնելն ի՞նչ հետևանքներ կարող է ունենալ, Ոսկանյանն արձագանքեց. «Ակնհայտ է` եթե դու չես հետևում տարածաշրջանում ընթացող գործընթացներին ու չես արձագանքում դրանց, ապա խնդիրների ամբողջությունը դառնալու է կույտ, ու չես կարողանալու կողմնորոշվել` որտեղից սկսել ու որտեղ ավարտել: Մենք այս հարցով, կարծես, չենք աշխատում Նահանգների հետ: Անկախ ամեն ինչից` ԱՄՆ-ն Հայաստանի հետ գործընկերային հարաբերություններ ունեցող երկիր է, ու մենք հստակ չգիտեք էլ` ինչպիսին են լինելու ԱՄՆ-ի հետագա քայլերը Իրանի նկատմամբ»: