Վրաստանի համար շատ կարևոր է, որ տարածաշրջանային հակամարտությունները չտեղափոխվեն իր տարածք. Վրաստանի նախագահ

Վրաստանի համար շատ կարևոր է, որ տարածաշրջանային հակամարտությունները չտեղափոխվեն իր տարածք: Այս մասին ՀՀ նախագահ Արմեն Սարգսյանի հետ ունեցած առանձնազրույցից հետո լրագրողների հետ հանդիպման ժամանակ ասաց Վրաստանի նախագահ Սալոմե Զուրաբիշվիլին՝ նշելով, որ տարածաշրջանում շատ մարտահրավերներ կան, ուստի  խնդիրները պետք է լուծվեն խաղաղ ճանապարհով՝ հիմնված  միջազգային իրավունքի վրա:

«Հակամարտությունները խանգարում են Հարավային Կովկասի երկրների զարգացմանը, ուստի դրանք պետք է կարգավորվեն խաղաղ երկխոսության ճանապարհով: Մեզ համար շատ կարևոր է, որ Վրաստանի քաղաքացիները՝ էթնիկ հայերը և ադրբեջանցիները, հանրապետությունում խաղաղ ապրեն»,- ընդգծեց Վրաստանի նախագահը՝ հավելելով, որ ինքը պարտավորություն ունի Վրաստանում ապրող հայերի համար ավելին անելու, որպեսզի նրանք կարողանան ինտեգրվել Վրաստանի մշակութային, կրթական կյանքին:

Ըստ նրա՝  Հայաստանը և Վրաստանը մեծ պոտենցիալ ունեն ավելի ամուր համագործակցության համար՝ տնտեսության, տուրիզմի, տրանսպորտային ենթակառուցվածքների և էներգետիկայի ոլորտներում: 

Այս համատեքստում Վրաստանի նախագահ Սալոմե Զուրաբիշվիլին անդրադարձավ երկու երկրների ընդհանուր սահմանի սահմանագծման խնդրի լուծմանը: