Հակամարտությունները նույնական չեն, հետևաբար` նույնական չեն նաև դրանց կարգավորման հիմքերը. Արմեն Սարգսյան

Հայ-վրացական հարաբերություններին բնորոշ է փոխըմբռնման և վստահության մթնոլորտը, մեր համատեղ պատմությունն աչքի է ընկնում բարեկամ երկրների ավանդույթներով և քաղաքակրթական բազմաթիվ ընդհանրություններով. պաշտոնական այցով Հայաստան ժամանած Վրաստանի նախագահ Սալոմե Զուրաբիշվիլիի հետ հանդիպումից հետո հայտարարեց ՀՀ նախագահ Արմեն Սարգսյանը:

«Դրանց հիման վրա այսօր զարգանում և ամրապնդվում է մեր երկու երկրների բազմոլորտ համագործակցությունը: Եվ այսօր կրկին Վրաստանի հետ առանձնահատուկ հարաբերությունների զարգացումն իր ուրույն տեղն է զբաղեցնում Հայաստանի արտաքին քաղաքական օրակարգում, և այդ մասին են վկայում վերջին շրջանի ամենաբարձր մակարդակի պարբերական հանդիպումներն ու ձեռք բերված պայմանավորվածությունները: Արդյունավետ եմ գնահատում տիկին նախագահի հետ մեր բանակցությունները, որոնց ընթացքում անդրադարձանք փոխադարձ հետաքրքրություն ներկայացնող օրակարգային մի շարք հարցերի: ՀՀ-ն մշտապես շահագրգռված է տարածաշրջանում կայունության, անվտանգության և համագործակցության մթնոլորտի ձևավորմամբ և պահպանմամբ»,- նշեց ՀՀ-ի նախագահը՝ նշելով, որ Վրաստանի ղեկավարի  հետ քննարկել են տարածաշրջանային անվտանգությանը և հակամարտությունների կարգավորմանը վերաբերող հարցեր, և որ իրենք համակարծիք են՝  հիմնահարցերն ու հակամարտությունները նույնական չեն: