Մերկելի այցը պաշտոնապես չի հաստատվել. Բալայան

Գերմանիայի կանցլեր Անգելա Մերկելի այցելությունը Հայաստան որևէ պաշտոնական խողովակով չի հաստատվել: Այս մասին այսօր լրագրողների հետ ճեպազրույցում հայտարարեց ՀՀ ԱԳՆ մամուլի խոսնակ Տիգրան Բալայանը:

«Քանի դեռ այցելությունը հաստատված չէ ո'չ գերմանական և ո'չ էլ հայկական կողմից, կարծում եմ` ժամանակավրեպ է խոսել այդ այցելության, դրա արդյունքների և ակնկալիքների մասին: Եթե կլինեն պաշտոնական հաստատումներ մեր և Գերմանիայի կողմից, նոր կխոսենք»,- նշեց նա:

Տիգրան Բալայանը հայտնեց, որ դիվանագիտական պրակտիկայում ընդունված է, որ նման մակարդակի այցելությունների մասին հայտարարություններն արվում են միաժամանակ երկու մայրաքաղաքներում, իսկ ներկայումս նման հայտարարություն չկա:

Հիշեցնենք, որ ավելի վաղը լուրեր էին տարածվել, որ տարածաշրջանային այցի շրջանակներում Մերկելը կլինի նաեւ Հայաստանում: