Եթե չեմ վիրավորվել կամ տանկ խոցել, ուրեմն՝ պատերազմի մասնակի՞ց չեմ. բողոքի ակցիա՝ կառավարության շենքի մոտ

Ապրիլյան պատերազմի մասնակից տղաներն այսօր կառավարության շենքի մոտ էին հավաքվել՝ իրենց բողոքն արտահայտելու: Նրանք նշում են, որ իրենց զինգրքույկներում պատերազմին մասնակցելու մասին որևէ գրություն չկա:

Սամվել Մանուկյանը Yerkir.am-ի հետ զրույցում նշեց, որ ապրիլյան պատերազմի օրերին ծառայել է Հադրութի զորամասում՝ 1 տարվա զինծառայող է եղել: Նրա խոսքով՝ իր զինգրքույկում նշված է միայն, որ մարտական հերթապահություն է իրականացրել, այլ ոչ թե` ապրիլյան պատերազմին մասնակցել:

«Ասում են՝ քանի որ մեր զորամասում զոհեր և դիրքերի կորուստ չի եղել, ուստի այն  ընդհանրապես չեն համարել պատերազմի գործողություններին մասնակից զորամաս: Մեզ համար առավելությունն այդքան էլ կարևոր չէ, կարևորն արդարությունն է՝ եթե մասնակցել ենք, ինչո՞ւ չպետք է նշվի: Ինչպես կարող էր մեր զորամասը պատերազմական գործողություններին չմասնակցել, եթե առաջնագծի ողջ երկայնքով էին ընթանում մարտական գործողությունները, ինչպես և հայտարարվել էր այդ օրերին: Մեր զորամասում վիրավորներ ունեցել ենք, բայց զոհեր չենք ունեցել»,-  ասում է Մանուկյանը:

Նա այդպես էլ չի հասկանում, թե ինչպես են որոշում՝ ով է ապրիլյանի մասնակից համարվում, ով՝ ոչ: Մանուկյանի խոսքով՝ նույնիսկ այն դիրքերում, ուր թեժ մարտեր են եղել, ու ամբողջ զորակազմը զոհվել է, իսկ հարևանությամբ գտնվող դիրքը, որտեղ ոչ ոք չի զոհվել, դարձյալ չեն համարում քառօրյային մասնակից: «Հիմա պատերազմի մասնակի՞ց է նա, ով վիրավորվել է կամ տանկ է խոցել, իսկ մեկ ուրիշը, ով 10 կմ խրամատ է փորել, այլ գործողություններ արել, չի՞ համարվում մասնակից: Մեր զորամասում հակառակորդի շատ ուժեղ հրետանի է աշխատել, և շատ հնարավոր էր, որ ես էլ վիրավորվեի: Չէ՞ որ ապրիլյանի մասնակիցները մեր բանակի ներուժն են, և պետք է այդ պոտենցիալը ճիշտ օգտագործեն ու գնահատեն: Եթե այսօր չեն գնահատվում, հետո էլ չեն գնահատելու, բայց, միևնույն է, մենք էլի պատրաստ ենք մեր երկրի համար կռվելու: Ցավն այն է, որ ինձ հետ ծառայած 10 տղաներից 7-8-ն այսօր Հայաստանում չեն: Ինչո՞ւ: Ինչո՞ւ պետք է մեր պայմանները չլինեին այնպիսին, ինչո՞ւ չպետք է արդարություն չլիներ, որ նրանք էլ չհեռանային երկրից»:

Մանուկյանը նշեց նաև, որ քանիցս դիմել են նաև  պաշտպանության նախկին նախարար Վիգեն Սարգսյանին, հանդիպել նրա հետ, բայց խնդրին լուծում չի տրվել: «Հիմա ուզում ենք, որ նոր իշխանությունը, վարչապետ Նիկոլ Փաշինյանը զբաղվի այս խնդրով, և արդարությունը վերականգնվի: Ուզում ենք, որ հարցին վերջնական լուծում տրվի: Երբ պատերազմը սկսվեց, հայտարարեցին, որ պաշտպանության բանակի շփման գծի ամբողջ երկայնքով պատերազմական գործողություններ են, իսկ այսօր ասում են՝ այսինչ զորամասում չի եղել, այսինչում է եղել»,- ասաց նա:

Ապրիլյանի մասնակից մեկ այլ երիտասարդ՝ Գևորգ Գրիգորյանը, նշեց, որ թեև նախորդ կառավարությունը բազմիցս հայտարարել է, որ քառօրյայի մասնակիցները կունենան առավելություններ՝ կրթության, առողջապահության ոլորտում զեղչեր, բայց դրանք կյանքի չկոչվեցին: «Երբ առաջին զորակոչի տղաները զորացրվեցին, տեսան, որ շատ է ապրիլյանի մասնակիցների թիվն ու հասկացան, որ շատ գումարներ են տրվելու, դրա համար սկսեցին շատերի գրքույկում ուղղակի չնշել, որ պատերազմի մասնակից են: Իսկ գրքույկները, որոնք հետ էին ուղարկում զորամաս, իմ կարծիքով, ցուցում էր տրվել դրանցում նշում չկատարել: Եթե իմ զինգրքույկում նշված է, որ 2016-ին ապրիլից մինչև հունիս ես եղել եմ առաջնագծում, ինչպե՞ս կարող եմ մարտական գործողություններին մասնակցած չլինեմ: Եթե դու գտնվում ես առաջնագծում, անհնար է, որ չմասնակցես, այլ բան է, որ յուրաքանչյուրը տարբեր ներդրում է ունեցել»,- ասաց Գրիգորյանը:

Նրա խոսքով՝ իրենց հերոսի կոչում պետք չէ, ուղղակի արդար վերաբերմունք ու հավասար մոտեցում են ուզում: Գրիգորյանի խոսքով՝ մեկ այլ խնդիր էլ կա. բուհերը տարեցտարի բարձրացնում են ՄՈԳ-ի շեմը, իսկ ապրիլյանի տղաները, երբ վերադառնում են, բնականաբար, աշխատանքի կարիք էլ են ունենում: «Բուհերի ՄՈԳ-ի շեմը 9-ից դարձել է 11, և եթե դու չես ձգտում 11-ի, զեղչ չի էլ արվում: Այո, մենք ձգտում ենք սովորել, բայց, աշխատելուն զուգահեռ, դժվար է շատ բարձր գնահատականներ ստանալ: Խնդրի հետ կապված՝ փորձել ենք հանդիպել ԵՊՀ ռեկտոր Արամ Սիմոնյանի հետ, բայց մեզ չի տրվել նման հնարավորություն»,- ասաց նա:

Պայմանագրային զինծառայող, ապրիլյան պատերազմին կամավոր առաջնագիծ մեկնած Սասուն Մարգարյանն էլ նշեց, որ եկել է կառավարության շենքի մոտ, որպեսզի իր ընկերներին աջակցի: Նրա խոսքով՝ տղաները, որ անցել են պատերազմի միջով, պետք է իրենց փորձը փոխանցեն մյուսներին, դրա համար էլ պետք է պայմանագրային զինծառայողների աշխատավարձը բարձրացնեն, որ մյուսներն էլ փորձեն պայմանագրային զինծառայության զորակոչվել: «Պայմանագրային զինծառայողներից շատերը դուրս են գալիս ու գնում արտագնա աշխատանքի: Մեզնից 58 000 դրամ եկամտահարկ են պահում, և չեմ կարծում, որ զինծառայողներից ճիշտ է պահել եկամտահարկ, քանի որ մեծ գումար է այն կազմում: Այս տղաներին պետք է աշխատանքով բավարարեն՝ ընդգրկելով ուժային կառույցներով»,- ասաց Մարգարյանը: