Վարչապետ չէ, ով ուզում ա լինի. կառավարության շենքի մոտ բողոքի ակցիա վարող ԲՀԿ-ական

Արդեն տեղեկացրել ենք, որ արդեն երկրորդ օրն է` առևտրականները բողոքի ցույց են իրականացնում կառավարության շենքի առջեւ` պահանջելով կասեցնել փետրվարի 1-ից ուժի մեջ մտնող «Շրջանառության հարկի մասին» օրենքը: Ուշագրավ է, որ այսօրվա բողոքի ակցիան վարում էր ակտիվ ԲՀԿ-ական Արտակ Խաչատրյանը, ով ԲՀԿ-ական պատգամավոր Վահան Բաբայանի մտերիմներից է:

Yerkir.am-ը երիտասարդ ԲՀԿ-ականից փորձեց պարզել, թե կուսակցոթյունից նման ակցիա վարելու թույլտվություն ստացե՞լ է, ի վերջո, Հովիկ Աբրահամյանը ԲՀԿ ղեկավար Գագիկ Ծառուկյանի խնամին է:

«Ես կարծում եմ` սա կուսակցական հարց չի, եւ պարտադիր չէ թույլտվություն ունենալ»,- ասաց Արտակ Խաչատրյանը եւ եւս մեկ անգամ շեշտեց, որ կուսակցական պատկանելությունը կապ չունի:

Լրագրողի դիտարկմանը, թե խոսքը  Գագիկ Ծառուկյանի խնամի Հովիկ Աբրահամյանի մասին, ԲՀԿ-ականը փոքր-ինչ բորբոքված ասաց. «Եթե ես չեմ վախեցել բարձրախոսով բարձրաձայնելուց այդ ամենը… Վարչապետ չէ, ով ուզում ա լինի, եթե չի կարող սպասարկել ժողովրդի շահերը, ուրեմն պետք է չսպասարկի»: