Մենք նոր խթան կհաղորդենք ռուս-հայկական հարաբերություններին. Փաշինյանը` Պուտինի հետ հանդիպման ժամանակ

Սոչիում մեկնարկել է ՌԴ նախագահ Վլադիմիր Պուտինի և ՀՀ վարչապետ Նիկոլ Փաշինյանի հանդիպումը:

Պուտինը նախ ևս մեկ անգամ շնորհավորել է Փաշինյանին ՀՀ վարչապետի պաշտոնում ընտրվելու կապակցությամբ:

«Հայաստանը մեր դաշնակիցն է, գործընկերը: Ռուսաստանը Հայաստանի առաջատար առևտրատնտեսական գործընկերն է: Վերջին շրջանում նկատվում է առևտրաշրջանառության աճ: Աճում են ՀՀ-ից ռուսական շուկա գյուղմթերքի մատակարարման ծավալները: Դա շատ լավ դինամիկա է: Ես ակնկալում եմ, որ մեզ կհաջողվի ոչ միայն դա պահպանել, այլև բազմապատկել: Հույս ունեմ, որ մեր հարաբերությունները նախկինի պես կզարգանան: Մենք նույնքան ակտիվորեն կաշխատենք միջազգային հարթակում` սկսած ՄԱԿ-ից, վերջացրած տարածաշրջանային կազմակերպություններով»,- ասել է ՌԴ նախագահը:

Նիկոլ Փաշինայնը շնորհակալություն է հայտնել Պուտինին ջերմ խոսքերի համար և նշել, որ ուրախ է պաշտոնը ստանձնելուց օրեր անց նրա հետ հանդիպման հնարավորություն ունենալ, քանի որ կան քննարկման ենթակա հարցեր, սակայն կան նաև հարցեր, որոնք քննարկման ենթակա չեն, օրինակ` ՀՀ-ի և ՌԴ-ի միջև դաշնակցային, ռազմավարական հարաբերությունները, և ոչ ոք ՀՀ-ում հարցականի տակ չի դրել  ու չդնի  այդ հարաբերությունների կարևորությունը: «Մենք էներգիա ունենք` այդ հարաբերություններին նոր խթան հաղորդելու համար` և' քաղաքական, և' առևտրատնտեսական տեսանկյունից»,- ասել է նա:

Փաշինյանը նաև բարձր է գնահատել ՌԴ-ի հավասարակշիռ դիրքորոշումը, որը եղել է Հայաստանում ներքաղաքական  ճգնաժամի ժամանակ, նշելով, որ այն շատ կառուցողական էր:

Նա նաև շնորհավորել է Պուտինին մայիսյան տոների կապակցությամբ: