Գնա, գրի` ինչ ուզում ես. Հակոբյանն իր` «թանկացումը չի ազդի աղքատների վրա» եզրակացության մասին

Օրերս թերթերից մեկին տված հարցազրույցում ՀՀԿ-ական պատգամավոր Հակոբ Հակոբյանը, անդրադառնալով թանկացումներին և աղքատների վրա դրանց ազդեցությանը, ասել էր, թե թանկացումը չի վնասի աղքատին, քանի որ նա ինքն է խուսափելու թանկացած ապրանքներից:

Yerkir.am-ն այսօր փորձեց պատգամավորից ճշտել` արդյո՞ք պատգամավորին հարիր է նման հայտարարություններ անելը: Հակոբյանը պատասխանեց. «Առանց իմ պատասխանի... Գնա, գրի էն, ինչ ուզում ես»:

Լրագրողներից մեկի դիտարկմանը` մարդիկ նրա հրաժարականն են պահանջում, արձագանքեց. «Դուք էլ գնացեք, պահանջեք»:

Պատգամավորն այնուհետև հորդորեց. «Գնացեք, իմ ասածը ճիշտ կարդացեք»:

Yerkir.am-ի հարցին էլ` Հայաստանում աղքատներ կա՞ն, Հակոբյանը պատասխանեց. «Դուք աղքա՞տ եք»:

Մեր դիտարկմանը, թե ինքն է այդպիսի հայտարարություն արել, թե Հայաստանում աղքատներ չկան, պատգամավորը պատասխանեց. «Ես զբաղված եմ, գնացեք»:

Լրագրողի հարցին` չի պատրաստվո՞ւմ հնչեցրած հայտարարությունների համար ներողություն խնդրել հանրությունից և հրաժարական տալ, կրկին պատասխանեց. «Գնացեք, միացեք իմ հրաժարականը պահանջողներին»: