Հիմա էլ աղքատների ու հարուստների գերեզմանատներ ե՞ք ուզում. Արծվիկ Մինասյան

Ազգային ժողովում ընթանում են «Հուղարկավորությունների կազմակերպման եւ գերեզմանատների ու դիակիզարանների շահագործման մասին» օրենքում փոփոխություններին ու լրացումներին նվիրված խորհրդարանական լսումներ: Օրինագծում խոսվում է նաեւ մասնավոր գերեզմանատներ ստեղծելու մասին:

Այդ կապակցությամբ իր մատհոգությունը հայտնեց ԱԺ ՀՅԴ խմբակցության պատգամավոր Արծվիկ Մինասյանը: «Ի՞նչ է, ուզում ենք հիմա էլ աղքատների ու հարուստների գերեզմանատնե՞ր ունենալ: Շատ լուրջ խնդիրներ կան, բայց արդյո՞ք այս նախագծով մենք փորձում ենք այդ խնդիրները լուծել, թե՞ միայն մասնավոր գերեզմանատներ ունենալու հարցն է: Սա է ինձ մտահոգում: Բացի այդ, ես լուրջ մտահոգություններ ունեմ նաեւ այն խնդրի հետ, թե որքանո՞վ է նպատակահարմար հուղարկավորության հետ կապված ամենը տալ մասնավորին»,- հայտարարեց նա:

ՕԵԿ-ական պատգամավոր Հովհաննես Մարգարյանը, սակայն, կարծում է, որ դա կհանգեցնի ոլորտի առողջացման, մրցակցություն կսահմանվի, գներն ավելի մատչելի կլինեն: Նա ներկայացրեց «միջազգային փորձը»:

«Դուք ամեն ինչը հաշվի եք առել` եվրոպական, միջազգային փորձ, բայց հաշվի չեք առել հայկական ավանդույթը: Գերեզմանը սրբություն է մեր ազգի համար, երբ բիզնես գաղափարը մտցնում եք, արդյո՞ք Ձեզ մոտ կան այդ ազդեցության գնահատումները` սոցիալական, բնապահպանական, բարոյահոգեբանական»,- հարցրեց Արծվիկ Մինասյանը: Նա նաեւ հետաքրքրվեց, թե ամբողջական հայեցակարգ կա՞ ոլորտի վերաբերյալ: Առկա նախագծերը, ըստ նրա, քննարկման ենթակա չեն: Դաշնակցական պատգամավորն առաջարկեց հայեցակարգային մակարդակով դրանք ներկայացնել: «Կիսատ-պռատ բերել եք, սերունդների մեջ համերաշխությունն էլ եք վերացնում»,- իր մտահոգությունը հայտնեց Մինասյանը: