Զինկոմիսարիատների թիվը կկրճատվի. նախարար

«Պաշտպանության մասին» ՀՀ օրենքով նախատեսվում է զորակոչի անցկացման լիազորության փոխանցում ՀՀ ՊՆ-ին։ ՀՀ ԱԺ պաշտպանության և անվտանգության հարցերի հիմնական հանձնաժողովի նախագահ Կորյուն Նահապետյանը հետաքրքրվեց հիմնական զեկուցող` ՀՀ պաշտպանության նախարար Վիգեն Սարգսյանից, թե արդյունքում ինչպիսի՞ համակարգային և կառուցվածքային փոփոխություններ են կատարվելու զինկոմիսարիատներում։ «Պարզ է, որ այստեղ լրջագույն կառուցվածքային փոփոխություններ պիտի լինեն», - նշեց Նահապետյանը։

Նախարարը պատասխանեց, որ արդեն պատրաստ է զինկոմիսարիատների բարեփոխումների հայեցակարգը։ «Այն ենթադրում է զինկոմիսարիատների թվի կրճատում, խոշորացում, հնարավորությունների ավելացում, դրանց բացազատման սխեմաների սահմանում պատերազմական վիճակի համար և դրանցում քաղաքացիական հաստիքների թվի ավելացում»,- նշեց Սարգսյանը։

Նա նաև հավելեց, որ նախատեսվում է տեղական ինքնակառավարման և տարածքային կառավարման մարմինների հետ զինկոմիսարիատների շատ ավելի սերտ փոխգործակցություն։